WINDHOEK Ominista yIimaliwa Saara Kuugongelwa-Amadhila ota ti epangelo oli ilonga oshilongwa sha simana noonkondo kutya oongeshefa oontshona naadhoka dhopokati inadhi pumbwa ashike oshimaliwa opo dhi vule okusindana. Minista ota ti, epangelo ohali gandja omadheulo okupendula po omaunongo nowino okuyambidhidha oongeshefa oontshona naadhoka dhopokati okuza ashike pemanguluko lyoshilongo. Kakele okwa ndhindhilikwa omasindano gwontumba oshowo omandopo okuza sho oonkambadhala dhotango dha ningwa, ihe pamukalo ngoka epangelo otali ilongo mo oshindji shi na ongushu. Minista ota ti omanga oonkambadhala dha kwata miiti dha ningwa okugandja iimaliwa, inapu ningwa oshindji okugandja eyambidhidho kaanangeshefa, ndyoka li li oshinima sha simana kesindano lyopaunangeshefa. Oongeshefa oontshona naadhoka dhopokati odha ndopa molwashoka odha tsakanekwa ashike komashongo omanene gomikuli dhoka dhi na okufuta, oshowo ontseyo nomaunongo gopaunangeshefa inagi ihwapo. “Nonando enawapaleko lyokuthika pomikuli otali kala oshininenenima sha simana unene koongeshefa oontshona nodhopokati, otwa pumbwa okukatuka oonkatu dhoka tadhi kutha po okwaanuuthikepamwe, oshowo omaupyakadhi galwe mokuyambidhidha oongeshefa dhika dhopondondo yopevi,” minista ta ti. Kuugongelwa-Amadhila dhika okwe dhi popi poshituthi shedhimbuluko lyegwanitho lyomvula yimwe shelongelokumwe pokati koBank Windhoek noDevelopment Bank of Namibia. Oombaanga dhika mbali odha hanganene omvula ya za ko nelalakano okugandja omakwatho gopashimaliwa kaanangeshefa aashona naamboka yopokati. Bank Windhoek ota ti elongelokumwe ndika olya etitha mpoka aanangeshefa aashona ye li 29 ya mone omauwanawa nokweeta po oompito dhiilonga kaantu 212 okuza miitopolwa ihamano moshilongo.Oongeshefa oontshona naadhoka dhopokati dhoka dha mona omakwatho odha kwatela mo iikondo yayooloka ngaashi shoka shokulonga niitenda, omayakulo gopaunamiti, ookefe dhiikulya oshowo oositola dhoombasikela. Kakele kegandjo lyomikuli koongeshefa dhika, Bank Windhoek oha gandja wo omandungiko kongundu yaanangeshefa aashona mboka opo taye ya moshimpungu shika. Oshiketha shEpungulo lyOpashigwana shoBank Windhoek ohashi yambidhidha egandjo lyontseyo nomaunongo noproholama yopamuhanga nomahangano gaNdowishi ngaashi DED noGTZ. Ookasitoma 55 dhombaanga ndjika ohadhi kutha ombinga moprojeka yeiyambo, moka aanangeshefa aashona ye li 13 ya mana nale oproholama ndjika. Kuugongelwa-Amadhila okwa pandula oproholoma yegandjo lyomaunongo nontseyo, ta ti otayi ka eta po elunduluko momukalo gwegandjo lyomayakulo ga pumbiwa ge nasha noongeshefa dhoka oontshona. “Itashi ka taambiwa ko we okunyola ashike otjeke, nokukala omutumba wa tegelela oshimaliwa shoye shi galuke pamwe niihohela. Aanangeshefa aashona oya pumbwa endungiko neyambidhidho lyolela okuza kaakwatheli yawo,” minista ta yelitha. Poshituthi osho tuu shoka minista okwa gandja oonzapo kaanangeshefa mboka ya mana omadheulo gawo. Oombaanga dhika mbali odha ningi wo omaulikilo okudhimbulukwa esiku lyawo, mpoka aauliki ya li ookasitoma dhoBank Windhoek oshowo aakuthimbinga moproholama yegandjo lyomauyelele nendungiko kaanangeshefa aashona.