WINDHOEK Metitatu pethimbo lyomwiha, ongundu onene yaapangi oya gongalele pomuyelo gOshipangelo oshinene mOvenduka (Windhoek Central Hospital) nokuninga oshigongi shiikundaneki okukundanathana kombinga yomainyengo omape ge nasha nomahilathano pokati kehangano lyawo Namibian Nurses Union (Nanu) nepangelo. Aapangi oshowo epangelo kehe gumwe okwa dhika oonyala mevi nokudhama komatokolo gawo ge nasha nomaindilo gawo okuza nkene oshikumungu shika sha tamekele okuthika pehulilo lyomvula ya zi ko. Nanu ota ningi omatilitho kutya ngele epangelo itali gwanitha po omaindilo gawo okunawapaleka oondjambi nomalutayima, ehangano ndika olya gandja esiku lyahugunina sigo eti 23 Januali 2007, nangele inapu ningwa sha iilyo yoNanu otayi ka thiminikwa okwiiteeka miilonga. Pauyelele waAbner Shopati, ngoka e li omuwiliki goNanu, eti 23 Januali itali ka kala we esiku moka taya ka ninga ekanka ndyoka tali popiwa, kakele mesiku moka ehangano ndika otali ka tokola kutya otali ka ninga ekanka nenge aawe, nangele otapu ka ningwa ekanka otali ka ningwa uunake. Omapopyo ngaka oge li ompinge niikundaneki yimwe moshilongo mbyoka ya kala nokukundaneka kutya aapangi otaya ka kala nekanka enene moshilongo ashihe momasiku 23 Januali. “OngamushangaNdjayi goNanu, inandi tseya oonkatu dholudhi ndoka, oshowo ewiliko lyoNanu alihe kali shishi. Shoka twa tseya shi nasha nomasiku 23 Januali olyo esiku lyahugunina epangelo li kale lya gandja eyamukulo lyopambelewa komaindilo getu,” Shopati ta yelitha nokuulika komukanda gomanyenyeto ngoka ya gandjele kepangelo kuyele eti 6 Desemba omvula ya zi ko. Shopati ta ti ngele ope na ekanka lya longekidhwa momasiku ngoka inali longekidhwa koNanu oshowo kutya kape na iilyo nenge aayambidhidhi yawo taya ka kutha ombinga meiteekomiilonga li li ngaaka. Kakele, esiku ndyoka tali popiwa miikundaneki kutya andola omo taya ka ninga ekanka, esiku ndika olyahugunina ashike kepangelo okuyamukula komaindilo goNanu, nangele epangelo olya ndopa mushika, pauyelele waShopati, nena ewiliko lyehangano lyawo otali ka ya mekwatathano niilyo yalyo nokutokola kutya onkatu yinipo ye na okukatuka – nompito opo yi li okuninga ekanka moshilongo ashihe monakuyiwa.. “Tse itatu sholola oshowo kutya inatu hala okukatuka onkatu omanga epangelo inali ninga etokolo, kakele otatu tsikile nekondjo sigo omuhona gwetu a taamba ko nokusimaneka omanyenyeto getu,” Shopati ta ti. Mokupulwa a tye ko sha, Amushanga Omukuluntu mUuministeli wUundjolowele nIilonga yOnkalonawa, Dr. Kalumbi Shangula, ota ti uuministeli wawo owa thikama ashike poshitsa shawo, noshinima shika otashi kundathanwa kwaayehe ye na mo oshipambu mwa kwatelwa Ombelewa yOmuprimaminista. Metiyali Ominista yUukalinawa, Dr. Richard Kamwi okwa londodha aapangi moshilongo ashihe kutya ngele oya kutha ombinga mekanka kehe omwedhi nguka nena oyi ilongekidha okutaalela “iilanduli ya yaga kegonga.” “Kape na omuntu e li kombanda yoveta. Shoka ndi wete osho shoka kutya iilanduli otayi ka kala ya yaga komuntu kumboka itaya ki iyutha nokupulakena. Shi nasha nesiku ndyoka, aapangi ayehe otaya londodhwa kutya omuntu kehe otaka ungaungwa naye paumwene ihe hapangundu,” Kamwi ta gunu aapangi poshigongi she naapangi kOpuwo. Metitatu, Shopati ota ti oontamanana dhi nasha niinima yaaniilonga odha ningile “oshinima shopaumwene nopolotika” momasiku 13 Desemba omvula ya zi ko sho Omupehaminista gUuministeli wIinima yAaniilonga, Petrus Ilonga, a popi kutya Shopati “omutondi goSwapo” oshowo kutya na tidhwe miilonga. Ota ti ishewe kutya Amushanga Omukuluntu mUuministeli wUukalinawa, Dr. Shangula okwa tile: “Tse otwa kundanekwa kutya oshikumungu shopethimbo ndika kashishi oshinima shi nasha niinima yiilonga. Osha kakanywa kiinima oyindji yopapolotika.” Shopati okwa gana okwiiyambela ombinzi ye okugwanitha po omaitaalo ge/omatokolo ge, ta ti uuministeli otau ningi omambandameko, omatilitho nokulyatela pevi omaiyuvo ge shoka shi li ompinge nekotampango. Okwiipatana kutya ye ka li gumwe gomiilyo yokakomitiye hoka aniwa ka tinda ethaneko lyomalutayi gaapangi ngoka ihaga lunduluka ngaashi sha thanekwa kuAmushanga Omukuluntu, ta ti oshigongi shoka inashi ningwa nando. Oonkambadhala okuya mekwatathano nominista kombinga yoshizemo shoonkundathana dhawo nOmuprimaminista Nahas Angula, minister Kamwi ina vula okumonika a tye ko sha.