WINDHOEK Uuministeli wElongo owa gandja eshilipaleko kaanasikola ayehe yoGrade 10 oshowo mboka yoNAMCOL kutya ayehe otaya ka mona omahala miipundi moGrade 11 nuumvo. Mokupopya noshikundaneki Nampa metitano lya zi ko, Omutaleli gOshikondo shElongo moshitopolwa shaKhomas, Ryno Nieuwoudt, ota ti okumonena omahala aanasikola ya li moGrade 10 okwa tamekele okuza 15-16 Januali notali tsikile poKatutura Multipurpose Youth Centre ngele osenda ndjika oya tameke nomainyolitho. Nonando Niewoudt ina vula okugandja omuyalu gothaathaa gwaanasikola mboka taya yi moGrade 11, ota ti omalongekidho agehe ge nasha noGrade 11 otaga ka pwa eti 24 Januali, nokuza mpoka omuyalu gwaanasikola otagu vulu okumonika kutya oye li yangapi. Niewoudt ota ti aalongwa yoNAMCOL oshowo mboka ya li miipundi moGrade 10 otaya ka mona ompito shi thike pamwe okumona omahala moGrade 11, inashi fa monakuziwa sho aanasikola mboka yomiipundi kwali oyo haya talwa tango okumona omahala moGrade 11. “Aalongwa yoNAMCOL yoGrade 10 mboka ye na iitsa 23 noF mOshiingilisa otaya ka mona ompito shi thike pamwe, oshoka nale otwa kala ashike hatu tala tango mboka ya pita mosikola yomiipundi. Shoka tu na pombapila osho shika kutya otapu ka kala omahala ga gwanena aanasikola ayehe yoGrade 11 nuumvo,” Niewoudt ta ti. Pauyelele wOmutaleli gOshikondo shElongo, omikundu ngoka gu li po ogo ngoka gwaanasikola mboka ta ye ke ya kwatoka/ ya laata oshowo aanasikola mboka taya zi kiitopolwa yilwe mboka taye ya okutameka oGrade 11 moshitopolwa shaKhomas. Aalongwa yoNAMCOL ye li 42 mboka ya ninga omaindilo gomahala okutaambelwa moosikola inaye shi pondola okumona omahala moGrade 11, oshoka ye li 36 inaya mona iitsa 23 opo ya vule okuya moGrade 11, omanga yahamano ye na oomvula dha pitilila. Omunasikola ke na okukala noomvula dha konda 21 ngele okwa hala okutaambwa miipundi yosikola. Omanga omuyalu omukwawo gwaanasikola 54 mboka ya ninga omaindilo ya mona omahala.