WINDHOEK Kakukutu kOmatanga moNDF, Leitenanda Ndjayi Martin Shalli ita tsu kumwe nomapopyo geningilo-ponto, uukombunda nuukwamuhoko moNDF shi nasha nomayelo oshowo egandjo lyoombandi kaakwiita. Omitotolombo dhoka odha kala tadhi popilwa omayelo goonkatu dhaakwiita iiwike ya zi ko. Otaku tiwa aakwiita moNDF mboka ya longa ethimbo ele oya holola eiyuvonayi neyeme lyawo kombinga yomikalo dheyelo negandjo lyoombandi kiilyo yetanga lyegameno, taya ti ookomanda yawo natango otaye ya ende pomunkulo nokudhina iilonga yawo. Aakwiita otaya nyenyeta kutya aakuluntu yawo ohaye ya lombwele aluhe kutya oshilyo shetanga lyegameno opo shi yelwe nenge okupewa ombandi/iishako omuntu oku na okusa tango opo a mone eyelo miilonga. Enyenyeto lyawo enene oli nasha nomapopyo guukombunda nuukwamuhoko moNDF, omukundu ngoka gwa talika ko “omukithi kaagu na epango,” metanga lyegameno. Kakele moonkundathana naKakukutu Ndjayi Martin Shalli okwe shi yelitha kutya ye ina tseya uukombunda, uukwamuhoko nenge omikalo dhontumba dhokatongotongo moNDF. “Iinima mbyoka oyi li omiyonena dha yaga kegonga nohayi ungaungwa nayo. Aantu mboka ye na omauyelele otaya vulu okugandja omauyelele kiikondo yayooloka, mwa kwatelwa ombelewa yandje opo ga konakonwe,” Shalli ta ti. Aakwiita otaya nyenyeta wo kutya aanambelewa mboka ye li moonkatu dhokukomanda omatanga oya posipala okumona omauwanawa niilonga mbyoka ya longa, kuyo iilonga ihayi dhana onkandangala momayelo goonkatu dhopakwaita. Omapopyo gamwe ga dhiginina otaga ti kutya aakiintu poompito dhimwe oyo haya yelwa nokupewa oombandi, oshoka ohaya yi miihulo nayamwe yomaanambelewa aakuluntu. Omukundu nguka ohagu nyenyetwa paempito odhindji miikondo yetanga lyegameno niikondo yilwe moNamibia, kakele omapopyo ngaka omadhigu noonkondo okumonenwa omaumbangi. Aakwiita yamwe otaya ti ope na omuyalu omushona gwaakiintu mboka ye li poonkatu dhopombanda moNDF, taya ti yamwe yomuyo inaya adha iishako mbyoka kuyo yene. Aakiintu ohaya geye noonkondo ngele aantu taya popi oshinima shoka, taya ti oya tala ko omapopyo ngoka ga nika omatukano nombepo yokatongotongo kopaukakwashike-ko-kantu. Oshikwawo omapopyo ngoka ihaga tala kutya aakiintu mboka taya popiwa otashi vulika ye na elongo lyopombanda noonzapo yevulithe aalumentu – nonando aalumentu yamwe oya kala metanga lyegameno ethimbo ele. Otaku tiwa kape na uushili mushika, oshowo kape na omuyalu gwothaathaa tagu vulu okupewa oshigwana ngoka tagu lulike kutya ope na omuyalu ogundji gwaakiintu oyendji ye na iishako noombandi moNDF. Aakwiita aalumentu otayi ipula wo kombinga yontseyo yaakwiita aakiintu oyendji mboka ye na iishako ngele otaya vulu tuu shili okukomanda omatanga gaakwiita ngele opwa holoka iita. Omapopyo gamwe otaga ti wo kutya uukodhi otashi vulika owo tau dhana onkandangala mokati kaakiintu yamwe aagundjuka moNDF sho haya “landitha po” omalutu gawo kaanambelewa yawo aakuluntu opo ya mone omayelo niishako metanga lyegameno. Aakwiita mboka ye na iishako yondondo yopevi otaya nyenyeta kutya ihaya vulu nando okuyelekwa nayakwawo mboka aakiintu – oshoka aakiintu ohaya yi miihulo naambelewa aakuluntu. Shi nasha nomapopyo ngaka, Shalli ota ti ina tseya sha kombinga yomapopyo ngoka. “Naya gandje iiholelwa. Ngele ope na omuntu a yelwa / a pewa iishako molwaashoka a hokanwa komunambelewa omukwawo moNDF, naya ete uumbangi mbuka,” Shalli ta ti. Shalli ota ti aakiintu naalumentu ayehe ngele ohaya yi momakwatathano ge li ngeyi otaya vulu okugeelwa nokumonika ondjo shi thike pamwe. Kakukutu komatanga ota ti nani ngele osho shili ngawo omulumentu naye ota vulu okuyelwa nokumona iishako ngele ohayi miihulo nomukiintu e na oombandi dhopombanda, onkee ombedhi itayi vulu ashike okupewa aakiintu nani ngele osho shi li ngaaka. “Ngame kandi na omauyelele ngoka taga vulu okuyambidhidha omapopyo goludhi ndoka. Aantu oye na okulandula omilandu dhomondjila okupitila mookomanda nenge otaya vulu okugandja omauyelele meukililo kombelewa yandje,” Shalli ta yelitha. Ta ti omalongithonayi goonkatu taga popiwa oge li omikalo dhuumbwigi wuulingilingi. nangele aantu kaye na einekelo moNDF okuungaunga nomanyenyeto ngoka, otaya vulu okulopota iinima mbyoka koKomisi yOkukandeka Uulingilingi (Anti-Corruption Commission). Kutya nee omapopyo ngoka omu na uushili wu nasha nomakwatathano gopaihulo nenge gopahole moNDF, etanga lyegameno olya pitika iilyo ayihe. Momatanga gaakwiita giilongo yilwe nenge iikondo yoludhi lwaanambelewa haya zala oounifoloma muuyuni, omakwatathano gopahole mokati kiilyo yetanga limwe ano aakiintu naalumentu inali pitikwa nando – naashika osha indikwa lela. Etompelo enene mushika okuyanda omapopyo nomitotolombo dhomaludhi ngoka taga ningwa kaakwiita pethimbo ndika moNDF.