MUETELELI wa sikiliti sa Caprivi, mutompehi Bernard Sibalatani sa kupile ba katengo-tuna ka Putako mwaofesi ya Ngambela wa naha sikuka sa kamo lisebeliso za putako ha kuamwa za munda lita kupelwa ni kusebelisezwa hande haiba kuba ni munda tuna ni kufita silimo se. Mezi a nuka tuna ya Lyambai anza zwelapili kupahama ka butungi bobu zielize mi ka bona butungi bo, mezi a munda anza sweli kuno suta ka zazi ni zazi kwatuko ni minzi ya sicaba sesi pila kwamukulo wa yona nuka ye ni kutibisa minzi yen`wi. Sibalatani na kile a taluseza ba mutende o sunda ye felile kuli munda wa silimo se, u bonahala kun`atafala hahulu. Mezi mwanuka tuna ya Lyambai la bunee sunda ye felile hana kilwe a pimwa na yemi fa butungi bo bu likana lilima ze 6.05 ha kubapanywa ni butungi bwa lilima ze peli feela mwamunda wa silimo sale sa 2004 mwakweli ye swana ye ya Yowa. “Mezi anza sweli kuno pahama. Lu tokwa lisebeliso za putako kuli lu kone kututisa bayahi haiba kuli mezi inge a pahama hahulu ni kufita,” na tumusize. Munda wa silimo sale sa 2004 ki one u bile o pahami hahulu muta nuka ya Lyambai I yema fa butungi bwa lilima ze likana 6.64. Ha ku sika zibahala kale mwanako ya cwale ye nji munda wa silimo se uta n`atafala hahulu ni kufitelela wani wa silimo sale sa 2004. Mubakweli wa sipula-tuna mwakatengo ka putako mwamulenen`i wa Windhoek, mutompehi Gabriel Kangowa na nitifalisize ni yena kaza munda wa silimo se, ka kubulela kuli sikwata sa licaziba ze talu sita esha mwatolopo ya Katima Mulilo kamuso la bubeli. Sikwata sesi ta ba mwaketelelo ya Mun`oli ya ‘Inelelezi,’, mutompehi Mbeuta ua Ndjarakana si lela kuswala ngambolo ni Gabana ni maofisa ba ban`wi kaza linzila za kamo ku konwa kutiisezwa mingendenge ni misebezi ya putako ye inzi kale fa ‘mukwakwa’ mwanako ya cwale. Sikwata hape sita nyakisisa kaza litokwahalo za batu bene ba kilwe ba tutisezwa kale kwamunzi wa Schuckmannburg. “Lu bata kuikopanya ni batu bese ba tutisizwe kale ili kuli lu kone ku n`ola piho sakata ye tezi yeta tambekwa kwamubuso.” Ka kunyakisisa kaze ta fumanwa kaufeela, Mun`oli yo Muhulu wa Katengo ka Makwambuyu, mutompehi Frans Kapofi kutuha a biza mukopano tuna wa putako ni kuikambota kaza piho ka butungi luli hape kuli ku konwe ku ngiwa muhato sakata. Kangowa sa kile a ikopanya kale niba Likolo la Njimo ka kupo ya tu mabboti totu konwa kuitusiswa mwalibaka zese apesizwe kale ki lona likayamana le. Bboti ye tuna I yemi kale mwatolopo mi I litezi feela kuli haiba likayamana inge li ekezeha hahulu i tutise sicaba kaufeela mwalibaka ze. Bboti I kona ku longa batu ba mashumi a mabeli (20). Kakuya ka Kangowa mabboti a man`ata kutuha a tokwahala haiba kuli mezi inge a zwelapili kupahama cwana ni kutisa kuli mane ba makampani-tuna ba kupiwe lituso ni bona. “Ba Namibia Red Cross ba litezi feela. Ba litezi feela piho mi luta ba lumela zebe kaza litokwahalo kaufeela mwalibaka zelu ta potela kaufeela,” Kangowa na ekelize. Ka kushelana ni mwalibaka zen`wi mo kuezanga kuli haiba nuka kiye sulula mezi a munda a, butungi ni bona bu kutela fafasi kono hee, mwanuka ya Lyambai mona mezi ni ha suluha cwalo ni kukashezwa kwande kona a zwelapili kuekezeha ili nto yese tisize kuli mane man`i ni man`i a nyunge toho, kakuya ka Gabana Sibalatani. “Mumatelo wa mezi mwamitayi kaufeela u pahami luli,” Sibalatani hana nyunga toho ya hae hape.