WINDHOEK Oku shi talela moonkundana tadhi popi endumbalo muundunda wokweedhilila aafekelwa piitaasi yopolisi oshowo moondholongo dhoyene, Omutamaneki-Ndjayi Martha Imalwa okwa tseyitha metitano kutya ombelewa ye otayi ningi omakonakono moshilongo ashihe shi nasha nomukundu nguka. Imalwa ota ti onkalo ndjika oya etithwa kiipotha mbyoka hayi tsilikwa ethimbo inali uthwa, iipotha yanathangwa mbyoka hayi tuminwa kompangu oshowo ekonakono lyomapeko lya nika uunkundi. Ota ti ota ka kwatela komeho oshikonga shoka tashi ka ungaungwa nasho kaanambelewa ye mboka ya ndjunguka noye na eitulomo. “Iipotha ihayi endelelwa po nande, naashika osho sha etitha onkalo moka tu li.” Oosipana mbali kehe yimwe omu na aanambelewa yopaveta yane okuza mOmbelewa yOmutamaneki-Ndjayi oshowo omupehakuluntu gOompangu dhOpevi otaya ka longa po iilonga mbyoka. Ota ti elalakano lyoshikonga shika okumona lela shoka tashi inyenge pethimbo ndika nokuungaunga niipotha mbyoka yanathangwa mbyoka yi li momusholondondo oshowo okoontamena momapeko nokungonga po olopota yi tumwe kepangelo opo li yamukule mbala komukundu nguka. Imalwa okwa londodha kutya ngele inapu katukwa onkatu, oshikondo shuuyuuki otashi ka gwa pevi, noku ke shi yumudha po otashi ka pula omazigudhe. Omutamaneki-Ndjayi okwa tseyitha wo kutya ombelewa ye oya tameka niikondo yayo yowina pehulilo lyomvula ya zi ko. Kakele iikondo mbika itayi longo shi ihwapo omolwompumbwe yoonzo dhopantu oshowo oshimaliwa. Ihe Imalwa oku na etimwaumbwile kutya iikondo mbika otayi ka adha omalalakano gayo. Okwiindile epangelo li gwedhele oshikondo she oshowo omauwanawa goondjambi dhaaniilonga ye. “Otwa taalelwa keshongo okushunitha pevi iimbuluma mbyoka ya lunda, omiyonena otadhi tsikile pwaa na eshunomonima, noombudhi odha kitakana miilonga noosikema dhadho.” Omutamaneki-Ndjayi ota ti ope na ompumbwe yomeendelelo okunyatipaleka nokupyokola aatamaneki yopaveta ongaagameni yoshigwana, okugamena omauwanawa goshigwana. Oshikondo shotango osho shoka shomadheulo nendungiko metonatelo lyaRolanda Gertze. Oshikondo shika oshi na oshimpwiyu shokudheula aatamaneki yopaveta opo ya kale ya pyokoka nokupendula po omuthika gwawo niipotha yiikulumuna. Oshikondo oshitiyali osho shoka shiilonga yopambelewa pakwalukehe nomayalulo tashi wilikwa kuEileen Rakow. Imalwa ota ti oshikondo shika osha simana noonkondo opo shi gandje ethano lyolela li nasha naashoka hashi ungaungwa nasho lela koompangu. “Oshikondo shika ohashi tu wilike okwaadha omalalakano getu okutala komasindano getu, omaunkundi getu, oompito dhoka dhi li po, nomashongo ohaga tothwa mo okupitila momukalo gwewiliko neunganeko lyiilonga ya ndjunguka.” Orben Sibeya oku li omutse goshikondo shi nasha nomiyonena dha dhuudhudhu wiimaliwa, uulingilingi, eyugoko lyomaliko neshunitho lyaapogoli aazayizayi kiilongo yawo. Imalwa ota ti Nambia okwa kala alulilwa koombudhi okuza kiilongo yopondje dhoka hadhi ya okukonga uuholameno moshilongo, oshowo Aanamibia mboka haya longo iimbuluma yi nyanyalitha oshowo iikulumuna hayi longwa mombepo yuufudhime koobotsotso dhoka hadhi henuka oshikondo shuuyuuki nokuya ontuku kiilongo yilwe. Omutamaneki-Ndjayi ota ti oshikondo shika otashi ka kwatela komeho ombelewa ye okukonga po omikalo dhokuyuga ko omaliko ngoka ga kitakana ga monika pamikalo dhuudhudhu noku ga ninga po gepangelo. Iikondo iikwawo oyo ngaashi Oshikondo shIikulumuna yIimaliwa, Oshikondo shIimbuluma ya kwata miiti, Omiyonena dhIihulo, Omahepekathano gOmomagumbo nOsapota oshowo Oshikondo shomiyonena dhakwalukehe. Okwa tseyitha ishewe kutya ombelewa ye otayi ka tsa omuthindo okutula po Olutu lwOpashigwana lwOonkundathana kombinga yUuyuuki wa guma Iikulumuna moshilongo. Ombelewa oya totha mo nale aayambidhidhi yayo mboka taya ka kutha ombinga mosheetwapo shika. Imalwa ota ti shimwe shomomaupyakadhi okwaadha nokupendula po omukalo guuyuuki osho shoka kutya oongundu adhihe momukalo goshikondo shuuyuuki ohadhi longo kehe yimwe muuwike wayo yene. “Kape na eimangokumwe mokuninga etokolo, niilonga yakehe gumwe oshowo ombelewa kehe otayi longo ashike paumwene pwaa na okukwatela po lyedhina lyoshikondo, onkee ethimbo olya thikana opo tu landule omukalo gopamuhanga ngoka tagu tu hanganitha mekondjo lyokulwitha omiyonena,” Imalwa ta ti.