OKAKU Aanamukunda ye li 50 lwaampoka oya pewa oonzapo dhawo muunamapya wokulonga oowowa metonatelo lyOunivesiti yaNamibia (UNAM) oshowo endiki lyedhina Zero Emission Research Initiative (ZERI). Oshituthi shegandjo lyomikanda dhuulongelwe wokulonga oowowa osha kalwa kOmukuluntu goUNAM, Omuprofessa Lazarus Hangula, Omukuluntu gOshikondo shUulongelwe nOmapekapeko, Omuprofessa Osmund Mwandemele ngoka e li kakukutu nomuyambidhidhi goprojeka ndjoka ya tamekele niilonga yayo moshigwana momumvo 2005. Omuprofessa Hangula moshipopiwa she sheegululo ota ti oprojeka ndjoka oye shi ulike kutya mokupendula po uunamapya wokulonga oowowa oshowo oonzo dhilwe ngaashi iikwamboga yomefuta (iikulya yomefuta) onkalo yoluhepo otayi vulu okunengenekwa menenevi Afrika. Shika osha ulike kutya uuyamba woonzo dhopauntshitwe dhaAfrika otadhi vulu okuyambulwa po kAayafrika yoyene okukandula po omashongo ogendji ga taalela enenevi. Ishewe otashi ulike kutya omaupyakadhi goHIV/AIDS taga hepeke enenevi Afrika otaga vulu okuungaungwa nago nepondoko, nokwetela iigwana yaAfrika etegameno nuuhupilo okupitila melongitho lyuudhindoli wayooloka waAfrika ngaashi uunamiti wiikwawowa. Oshituthi osha popithwa wo kOminista yUunamapya, Omeya nOmakuti, Dr. Nickey Iyambo, ngoka oshipopiwa she sha leshwa peha lye kuVicky Naudili, omunambelewa guuministeli mbuka. Minista okwa pandula etotepo lyoprojeka yuunamapya woowowa pOkaku nOkollege yUunamapya pOgongo, ta ti oyi li uumbangi weitulomo lyoUNAM oshowo ZERI. Ooprojeka dha faathana odha totelwe ishewe poHenties Bay, Gobabis noMariental neyambidhidho lyokapandi koodola N$450 000 okuza koNedbank. Oshitopolwahogololo Okaku omu na onkalo yokwaaniilonga yoopelesenda 64, nomu na aakwashigwana konyala ye thike paantu 20 000. Mokati kaakwashigwana mbaka, aantu ye li 700 okwa tegelelwa ya ka mone omauwanawa moprojeka ndjika sho taya ka moka konyala oshimaliwa N$700 komwedhi momuntu.