Vakadona vana siki komurongo nantazimwe momukunda horowero gwaKhomas tava lituramo valironge siruwo sepwizumuko,awo kuna kulironga muvaru nounkurungu.Awo kava yigusire yirongwa eyi negano asi vana hara kuwapukurura meho zawo.Awo kuna kulimburura yitundwamo eyi yina kara asi kwayigeve mbunga ezi vana kutumbura asi Forum for Africa Women Educationalist Namibia(FAWENA)ezi azi gwana mbetero kovantu ava vatunga moNamibia ava uyunga rundovesi.Namibia naso sirongo simwe sina lituramo mweyi 32 moAfrica asi vakadona nawo valironge. Apa kakazegwilire epongo eli mukurona gendesi gerongo momukunda Khomas Claudia Tjikuua,kahundilire vakadona ava valituremo unene melirongo yipo nawo vavavarure asi kuna kukambekako kuwoko kekuliko lyosirongo.Nampili ngomu vana kara asi vakondi vamwe simpe kuna hara asi vamati velike wokuvhura kulironga,Tjikuua katente asi eyi yahava dompesa tupu nomutjima valironge.Age katente asi vakurona vamwe kwahara tupu vana wovagara yiyo vanyenga wovakadi asi morwa vakadona kugwana mazimo makura tavasigi sure,eyi vamona awo asi kumana tupu eyi vaweka yahana kurugana yuma.Yitundwamo kuna kulikida asi vakadona yiwo ava kalitjangesa wovanzi apa ali tameke elima nye apa nazi kapwira mvhura sinzi sawo vanadukamo.Sihonena mo2004,kwakere varongwa 28 907 montambo zomurongo sinzi sawo ava vasikire ko 15361 kwakere vakadona ano ava 13546 vamati.Apa vakasika kontambo zomurongo nambali vakadona nare vana kara 6873,ano vamati vana kara 7121. Eyi kwalitjindjilire morwa vakadona vana gwana mazimo nomaudigu gamwe ngoso aga gakara meparu.Nampili ngoso mukurona gerongo momukunda ogu katente asi epangero lyaNamibia lina lituramo asi nkenye gumwe munona alironge ntani kwato asi mumati ndi mukadona.Esi sikare nye sinka sanyamweni vanona mudive asi mugusepo maudigu aga gakara meparu lyeni yipo mulirongo mutware muhoko komeho.Age simpe kahundilire vakadona asi vahazumbanese nampili nakauke mukaro gwawo gokukara asi vakadona.FAWENA sinka sendi kufira vakadona nkenda yipo valironge,mbunga ezi kwatunda momavavagaFAWE ezi vatoterepo mo1992 zivatere yirongo yaAfrica melirongo lyanavenye.Mberewa zawo zonene kwakara moNairobi,moKenya awo kwakara nomaligwanekero noyirongo 32 yomoAfrica,omu valituramo mokutara noveta.Awo kutara unene asi veta zahaninkiliramo vakadona ava vana kulirongo mokukatura nayinye moyirugana.Azo ngesi kuna parapo asi vakadona vahepa nawo kulironga ngwendi vamati.Awo vana lituramo asi vakadona vaparuke nawa eparu eli lyawapera kuliparuka mukadona gomoAfrika ndi mouzuni.