I Wezi Tjaronda OTJOMUISE Ovanamibia mbatura no kuungura mo UK nousemba wozombura mbari zokuryanga no kuungura veyandja ohambwarakana onene ko ma pupaparisiro wo u kaiya monganda. Ongondononeno yombwiro yombwiko ndjimuna Ovanamibia mbeungura mo UK ombura indji yaraisa kutja imba mbari norupa muyo vazira kutja vahinda otjingi tjotjimariva tjivesutua konganda. Okusasaneka omunamibia nguungura mo UK unyikora Ozopondo 12,730 mombura nderi ape Ozondola za Namibia 179,000 mombura.Ape ozopondo o 6,609 (Ozondola za Namibia ape 93,000) zeyaruka movikurya, otjitjamurongo kohoromende na momuzaro, movihepwa vyarwe. Otjihupe otjipeya a tji hindua nguno ko Namibia. Onongo Garvey Kavei, ngwatura mo UK oure wozombura wamuna mongondononeno indji kutja ohepero kombwiko Ovanamibia mbeungura ko UK vepwika ape ozoperesende o 29 zotjimariva tji tjihindua ko Namibia momambo wo zo mbaanga mo Namibia. Tjarwe otji tjavari tjondengu omatemba ngehindua ape ozopresende o 14 poo Ozopondo 17,250 (ape ozondola za Namibia 246,000) ngunda otjihupe tjo tjimariva atjiyenda ko vyungurisiwa vyo mozofarama no kusuta ozondjo monganda. Ongondononeno indji yatjitua mekoti rovandu o 47 muwo o 18 okupitira morungovi no 29 otjinyo kotjinyo. Oumune wo ngondononeno indji yondando yo kutjivisa ovake vo muhunga kutja vekare nondjiviro nOvanamibia momahi wo zonganda yaza momaziriro yaimba o 19 mbazira omapuriro ngahindua kuwo. “Mairaisa kutja ovandu o 19 mbeungura veyenena okuhinda nguno konganda otjimariva atjihe kumwe ape Ozopondo o 129,323 (ape Ozondola za Namibia o 181,000) mombura. Ihi matjihee kutja omundu auhe mayenene okupwika Ozopondo o 6,490 (ape Ozondola za Namibia o 90,000) mombura tjitjiri otjimariva otjipwikwa okuza pendje tjomasa,” Kavei watjere. Ozondjira ozengi kOvanamibia omitanda votjiwondo tjo pokati kozombura o 16 na 34 zatara ko UK. Mu imba mbapurwa ovengi ovakazendu vOvaherero ngunda otjihupe tjo imwe kombanda yo ndatu averi ovahungire vOtjiwambo. Otjingi tjawo ovakombe mbehina omatundu mo UK nu vamana ondondo oitja 12 yo mahongero. Ohinga yawo vakara mo UK oure wozombura ndatu ngunda ape ozoperesende o 26 avakara mo UK ozombura ndano no kombanda. Wina ongondononeno indji yamunine kutja ape ozoperesende o 76 zawo vetumba ovandu hamboumwe no kombanda monganda. Munao Kavei otji mamunu kutja mena rotjimariva otjingi tjivehinda ozombaanga zasere okuvevatera no kuhenununa otjimariva tjize vesutisa nu wina okuyera otjimariva otjikwatua tjo tjimariva tjao tjitjiri mozombaanga. Wina ohoromende yasere oku yarukira ongurameno yayo yo ku yenda ama ipata omatemba weke oritjavari ku iripurira moruyaveze.