WINDHOEK Omalelo gOpamuthigululwakalo oga ningi eindilo lyetulomiilonga yomeendelelo lyOveta yOompangu dhOpashigwana ndjoka tayi ka gandja oonkondo kaaleli yopamuthigululwakalo ya vule okuungaunga nuupu nonondjungu okupangula aakaulinyanga mboka taya ka ninga omiyonena dha yama iikulumuna yi nasha nuukakwashikwashike-kokantu mokati kaalelwa yawo. Eindilo ndika olya ningwa konima sho pwa holoka iiningwanima yomadhipago, omadhengo nomakwatonkonga taga ningilwa aakiintu naanona. Omalelo gopamuthigululwakalo oge shi koneka kutya omikalo odhindji dhopamithigululwakalo miigwana yayooloka ohadhi idhidhimikile natango nokutaamba ko omahepeko gopaukakwashike-ko-kantu. Eyukipalitho lyomahepeko ohali zi unene moohedhi nomauvoko gopambambo kombinga yuukakwashike-ko-kantu, iinakugwanithwa nonkandangala yopakwatathano pokati kaalumentu naakiintu. Shika osha etitha wo aakalekipo yoveta nelandulathano – ano aapolisi ya tale ko omahepeko goludhi nduka ongiinima yopokati kaaholike nenge omusamane nomukulukadhi, ano hashi talika ko oshinima shomegumbo nenge shopaumwene shaamboka ya gumwa kuupyakadhi noyo ye na okuungaunga nasho. Aaleli yopamuthigululwakalo oye uvite kutya oyo aakalekipo yomithigululwakalo noye na enwethomo enene kaakwashigwana mboka ye li kohi yomalelo gawo. Josef Asino ngoka a kalele po Elelo lyOpamuthigululwakalo mOndonga pOshigongi shi nasha nomahepeko gopaukakwashike-ko-kantu ota ti ngele omalelo gopamuthigululwakalo oga pewa oonkondo dhi ihwapo otaga vulu okundungika nokutaandelitha evaangeli tali kondjitha omiyonena nomahepeko. Ota ti aaleli yopamuthigululwakalo otaya vulu ishewe okukwathela opolisi, oshowo etulomiilonga lyooveta dhokukondjitha omiyonena, okuvudha mo omitotolombo dhi nasha nokulala naakadhona mboka inaya gumwa natango nokulwitha uuthiga wokuyuga aaselekadhi omaliko. “Otwa pumbwa okushilipaleka kutya otwa tula uukuni kumwe nelalakano okushilipaleka kutya mboka ya monika ondjo oya pewa omageelo ndele itaya mangululwa nando pamikalo dhopautekenika,” osho ta ti. Aaleli yopamuthigululwakalo pomutumba ngoka otaya indile ya mana mo ya mone omakwatho gopashimaliwa okuza kepangelo, oshimaliwa shoka tashi ke ya kwatha okuninga iigongipukululo, omadheulo netopolelathano lyopauyelele piigongi yi nasha nomiyonena nomahepeko ga guma uukakwashike-ko-kantu mokati kiigwana yawo. “Otwa pumbwa okukala nomulekenenothaneko gwiimaliwa gu nasha nokuungaunga nomaupyakadhi ngaka. Aaleli ayehe yopamuthigululwakalo oye na okuhangana nokupopya newi limwe mokukonga omakandulupo gomikundu, oshowo okukonga omayele kaaleli yopamithigululwakalo yiilongo yilwe. Omalelo gOpamuthigululwakalo oga pumbwa ethimbo lya gwana sigo Kotoba 2007 okudhiladhila nokuninga etokolo kushoka sha popiwa pomutumba mpoka,” osho omukalelipo gokoAminuis ta ti poshigongi shoka. Aaleli mboka natango oye uvite kutya Uuministeli wUuyuuki owu na okukonga po omikalo dhoku ya pa omayele kombinga yiinima ayihe yopaveta unene shi nasha nokuzula aapogoli/aayoni yomehepeko nomiyonena hadhi ningilwa oomeme naanona. “Omalelo gopamuthigululwakalo oga gandja omathaneko opo omahangano agehe niikondo yepangelo paendondo dhopaitopolwa yi tule omatha kumwe mokukondjitha omiyonena nomahepeko gopaukakwashike-ko-kantu mokati kaantu yiigwana ayihe,” osho Elenga enene lyElelo lyOpamuthigululwakalo gwaTopnaar, Seth Kooitjie ta ti. Oshilongo shika omwa kala ombepo yomadhipago oshowo iikolokosha nomiyonena. Vilho Kamanya gwElelo lyaNdonga ta ti kehe shoka sha pitikwa pamuthigululwakalo ka kwali sha dhiladhililwa okugandja ohethela yokuyonagula omauthemba gwomuntu. Oshoka esimaneko lyomuthigululwakalo oli na okushilipaleka esimaneko lyomauthemba gaantu yakwetu, mwa kwatelwa omwenyo nemanguluko lyomuntu, Kamanya ta ti. “Omuthigululwakalo kashishi oshinima ihashi lunduluka, nohagu simane onakuyiwa – onkee otu na oku gu longitha mokukondjitha omahepeko ngaashi omiyonena dhopaukakwashike-ko-kantu dhoka ootatekulu inaya kala taye dhi popile,” osho a tsu omuthindo. Aaleli yopamuthigululwakalo oya holola ishewe eyeme lyawo shi nasha nehedhitho lyomayakulo koshigwana tali ende kashona, unene kombinga yetulomiilonga lyomilanduveta paendondo dhopashigwana. Taya ti omilanduveta odhindji ohadhi totelwa ashike moshilandopangelo, kakele omafatululo gadho ohaga katashwa, na ihapu ningwa we oonkatu dhontumba dha gwedhwa po okutula miilonga omilanduveta dhoka paendondo dhopaitopolwa.