GOBABIS Ombelewa yOmukuluntukonakoni gwIinima yAaniilonga moGobabis, konyala esiku kehe ohayi yakula aaniilonga unene yomoofaalama mboka haye ya okulopota omahepeko, omanyokomo nomanyenyeto galwe. Omukonakonikuluntu gwIinima yAaniilonga moshitopolwa Omaheke, Sam Kambazembi oha kala a ngunguma ngele ta pulakene komanyenyeto nomalopoto gayooloka ngoka haga thikithwa mombelewa ye konyala esiku kehe, naashika osha ninga konyala omukalondjigilile okuyakula omalopotelo ogendji mesiku. Kambazembi ota hokolola kutya ogendji gomomalopotelo nomanyenyeto ngoka haga etwa mombelewa ye ohaga zi kaaniilonga yomoofaalama dhopaipindi. Iiningwanima mbika olundji oya kwatela mo okwaafuta oondjambi dhaaniilonga, okutidhwatidhwa kwaaniilonga, okundopa okugandja efudho kaaniilonga oshowo omatidho kaa ge li paveta, okwaafuta omalutayima oshowo omasiku gOosoondaha. Omukuluntukonakoni gIinima yAaniilonga ota ti miikoya oyindji, aanafaalama yopaipindi ihaya landula omilanduveta uuna taya kutha aaniilonga yawo miilonga. “Omunafalama ohashi vulika ashike a kuthe nenge a tidhe omuniilonga nokupopya kutya ye ka kwa li e na ethimbo okuninga iihokolola oshoka oye awike e li pofaalama.” Kambazembi ota ti ombelewa ye ohayi yakula konyala iiningwanima iheyali esiku kehe nokuninga ihe omakonakono, kakele ohayi ungaunga niipotha yi vulithe 30 mesiku. Kakele ota ti iipotha yi thike konyala poopelesenda 95 ohayi monenwa omayamukulo mbala omanga inayi thika nokuli kompangu yopashitopolwa yi nasha niinima yaaniilonga. Ta gwedha po kutya oohahende ashike mboka haya kalele po aanafaalama yopaipindi oyo paempito dhimwe haya thiminike okufala iipotha mbika kompangu. Kambazembi ta ti oyendji yomaniilonga yomoofaalama inaya longwa onkee inaya tseya wo omauthemba gawo, naashika ohashi ya ningi ya kale iihakanwa yelongithonayi kaanafaalama yopaipindi. “Aanafaalama yopaipindi oye na omauyelele gi ihwapo noye na ontseyo, nangele oya yi moontamanana nomuniilonga, olundji ohaya kwatathana nomahangano gawo gopaunafaalama ngoka hage ya pe omayele omawanawa, omanga aaniilonga olundji omolwondjahi ohashi vulika yi ihumbate pamikalo dhoka tashi vulika dhi yonagule nokuya moshipala iipotha yawo mompangu.” Hendrik Kojak omunamimvo 40, gumwe gomaaniilonga ngoka a popi nomukuluntukonakoni, ota ti omugandji gwe gwiilonga omukulu ine mu futa sha omwedhi gwa zi ko. Ota ti okwa li a tholomena omunafaalama oondhopi dhongushu yoodola omathele gahamano, kakele omunafaalama ina hala oku mu futa, ishewe okwa kuthwa omikanda dhe dhopashigwana. “Meme ngoka okwa kutha ndje okambapila kokamutse kandje, onzapo yevalo nokakalata koshipangelo, noitandi vulu okuya koshipangelo.” Kojak ota ti omuhona ngoka okwe mu guna ishewe kutya ina lyata nando ompadhi ye mofaalama ye, okuninga shila ta yi mo nelalakano oku ka tholoma oondhopi. Kojak okwa li e ende pamwe nomumwayinakadhona nomukulukadhi gwe esiku e ya okulopota oshipotha shika, nomukulukadhi ota ti oya kala taya si ondjala omasiku ga zi ko sho ya tegelela a futwe. Kasera Nambundu naye ota ti ina futwa uule woomwedhi ndatu dha zi ko sho a monene oshiponga a gwa konkambe ndele ta teka oondjego nokwaako kokolumoho muJanuali. Oshiningwanima shika osha ningwa manga a li miilonga mofaalama, nokwa ka kala moshipangelo uule woomwedhi ndatu. Omugandji gwe gwiilonga aniwa ota ti Nambundu oku na oku ka konga iimaliwa ye koSocial Security Commission (SSC). Nambundu ta ti omuhona gwe okwe mu lombwela kutya okwa tuma ofoloma yeindilo koombelewa oonene dhoSSC , ihe sigo oompaka ina mona ko nando okamaliwa kasha. Omukuluntukonakoni Kambazembi ota ti okumonena oshiponga miilonga miitopolwa yomahala gopaipindi ohashi holoka olundji, kakele omukundu ogu li mpoka kutya aanafaalama ihaya lopota iiningwanima mbika kombelewa ngaashi tashi uthwa paveta. “Aanafaalama ohaya fala ashike aaniilonga yawo kiipangelo yepangelo pehala lyoku ya fala koondohotola dhopaumwene mboka ye na okufutwa koSSC,” Kambazembi ta ti.