ONGWEDIVA – Omukainhu weedula 33 okwa monifwa oshiponga moshipala konima eshi vati a dengwa neengonyo komulumenhu waye molwaashi ina hala okuya naye moixulo.
Oshiningwanima eshi osha ningilwa meumbo lavo mexuliloshivike komukunda Okatundu moshitukulwa shaShikoto. Otaku hokololwa kutya omufekelwa weedula 40 okwa kala shito nokuningila omukainhu waye omahepeko omomaumbo eshi a kala vati he mu denge.
Omukulunhu wopolifi moshitukulwa shaShikoto Commissioner Teopoline Kalompo-Nashikaku okwa hokolola ta ti omufekelwa ina kwatwa po molwaashi meumbo okwa dja mo konima eshi a denga omukainhu waye. Okwa ti opolifi oye lipyakidila nokuninga omakonakono opo omufekelwa a kwatwe po diva. Okwa kumaida ovalumenhu opo va xulife po okudenga ovakainhu vavo ngeenge inava hala okuya moixulo.
Okwa weda po ta ti okuya moixulo ohaku di kehalo lomunhu onghee osha puka ngeenge omulumenhu ta i moixulo nomukainhu waye keenghono.
Oshiningwanima shikwao, opolifi mOshikoto otai konaakona oshiningwanima shefyo liheshi lopaushitwe, omu omukulupe womido 77 e lidenga po nokufya pefimbo a li ta di peendingosho.
Oshiningwanima eshi vati osha ningilwa poundingosho vopOkashana kIitembu momudingonoko wOmuthiya. Otaku hokololwa omulumenhu oo a didilikwa nedina Petrus Uulingi a dja peendingosho dopomukunda wavo, nelalalakano ngeno lokuya keumbo.
Otaku fekelwa Uulingi e lidenga po mondjila nokufya. Olutu laye olwe li tuwa kovanamukunda vavali ovo navo kwa li tava di keendingosho. Nonande ekalata laye inali monika kopolifi, ovapambele vanakufya vati ova shivifila opolifi kutya Uulingi ka li nande eli kepango lasha. Kape na okafekela kasha mefyo eli, nolutu laye ola twalwa kokila kOmuthiya opo li ka ningilwe omakonaakono.
Opolifi mOshikoto oya patulula yoo oshibofa omo omununyasha womido 21 Terfina Jacobina Kadhikwa e likufa omwenyo.
Otaku hokololwa olutu laKadhikwa le lituwa monduda yaye yokunangala komukwanedimo laye umwe. Inaku didilikwa kutya oshietifi shelimangeleko oshike, vali ina fiya po omushangwa tau holola kutya omolwashike e likufa omwenyo. Oshiningwanima eshi osha ningilwa meumbo lavo mOniihadi mOniipa.
Okwa lopotwa yoo oshibofa shelikufomwenyo mOshitukulwa shaShana omo omulumenhu wedina Simon Hangomo (41) e limangelekela monduda yaye yokunangala. Otaku hokololwa olutu laye le lituwa kovashiinda. Hangomo okwa li omukalimo momumukunda Okaandje momudingonoko wOngwediva.
Omakonaakono opolifi moingwanima aishe otaa twikile.
fthamalwa@nepc.com.na