OSHAKATI – Ofitola yedina Onawa hai landifa oikulya molukanda Oneshila mOshakati oya ponokelwa kookalyamupombo vane ndele tava vake mo oimaliwa i fike poN$9 273, eengodi nhatu dopeke omanga omunhu umwe a monifwa oshiponga.
Oshiningwanima osha ningwa Omaandaxa efimbo loufiku. Omukulunhu koshikondo shokukonakona oimbuluma wopolifi moshitukulwa shaShana, omupedukomufala Fredrick Ndjadila okwa hokolola ta ti oshiningwanima osha ningwa pefimbo ovanailonga va hangika ve li moilonga.
Opolifi oya hokolola tai ti umwe womulumenhu omulandi a hangika mofitola okwa monifwa oshiponga eshi a dengwa nohamala ndele ta tuwa vali nombele.
Okwa tambulilwa moshipangelo shaShakati ta mono epango lopaunamiti.
Otaku hokololwa kutya ovakeleli vomaliko tete ova ponokelwa ndele tava nyekwa eedjebo.
Opolifi oya hokolola tai ti ovafekelwa ova monika koufano ovo ve li mofitola ashike ouvidio ina yela nawa.
Onghee itava dimbulukiwa kutya oolyelye. Ovafekelwa ova faduka po nomakonako opolifi otaa twikile.
Opolifi otai ndile moshiwana kwaau e na ouyelele kombinga yovafekelwa ava opo shi kale sha lopotela opolifi keshe i li popepi.