Omulumenhu weedula 37 okwa xulifa eshi a dengwa noikulumbwati kovanhu vane mwa kwatelwa ovakainhu vavali.
Oshiningwanima osha ningwa Osoondaxa efimbo loufiku komukunda Kakuro koshitukulwa shaKavango West.
Omupopiliko wopolifi koshitukulwa shaKavango West Chief Inspector Raimbert Muronga okwa hokolola ta ti nakufya tete okwa denga omunhu ha di pomukunda wavo.
Okudja opo okwa ponokelwa kovalumenhu vavali novakainhu vavali ndele ta dengwa noikulumbwati nokuxulifila ponhele opo moixwa.
Opolifi oya hokolola tai ti mongula eshi kwa sha ovafekelwa ova shuna ponhele opo va dengela omulumenhu ou.
Ova hanga olutu lanakuninga oshihakanwa li li mekungu lohonde.
Ota ku hokololwa kutya okudja opo ovafekelwa ova shivifila opolifi ndele tave li yandje nokopolifi.
Otava holoka momhangu nena notava pangulilwa oshibofa shedipawo.
Omakonakono opolifi otaa twikile moshikumungu eshi.
Omufekelwa umwe oku na omido 42, umwe oku na 33 omanga umwe womukainhu oku na omido 40 naumwe oku na 38.
Opolifi oya kumaida oshiwana opo shi xulife po oku li kufila oveta yokudenga ovanhu molwashi ina shipitikwa.
“Omunhu ngeenge a longa oshimbuluma na mangwe ndele oshiwana tashi lopotele opolifi diva,” Muronga ta ti.