Omukiintu gwomimvo 31 okwa si eso lyi nyanyaleka sho a dhengagulwa noshitenda kukuume ke komiihole omanga inaa imangeleka.
Komufala gwopevi gwopolisi moshitopolwa shaMusati Moses Simao okwa ti, oshiningwanima shoka osha holoka Osoondaha, momukunda Okapya kaMbidhi.
Otaku hokololwa kutya omukiintu ngoka nomulumentu gwe okwa li ya monika taya nyenyeta uusiku wOlyomakaya sho omulumenutu ngoka a tameke okudhengagula omukiintu ngoka sigo a tatuka omutse.
Okuza mpoka okwe mu tsilike moombuli dhondunda nondhalate, e te mu mangeleke.
Otaku hokololwa kutya omukiintu ngoka okwa li ha longo megumbo moka lyaakuluntu yanamumati.
Omulumentu ngoka okwa mangwa po.
Moshiningwanima sha fathaana ohanona yomwedhi gumwe otayi mono uuhaku moshipangelo sho kwa li ya kuthwa moombale kuhekulu, sho kwa li tayi mangelekwa kuyina.
Sha ikolelela kolopota yopolisi yiiningwanima ya holoka mehuliloshiwike, omunamimvo 22 okwa mangwa po kopolisi, sho a li ta kambadhala okumangeleka ohanona ye momundhingoloko gondoolopa Okahandja.
Otaku hokololwa kutya ohanona ndjoka okwa li ya ningi elago sho omumwayina gwayina gwomumati, a li a teya po omweelo noku yi kutha moongodhi.
Okanona komwedhi gumwe natango oka hulithile mondhikwa yokamwayinakadhona koomvula hamano mOlyomakaya.
Oshiningwanima shoka osha holoka momukunda Ontoko moshitopolwa shaMusati.
Otaku hokololwa kutya yina yokanona okwa li i ipyakidhila niilonga yilwe, nokwa ka mona ashike kutya ohanona oya hulitha sho te yi kutha mo mondhikwa.
vkaapanda@nepc.com.na