Opolisi moshitopolwa shaShikoto oya pautululile omulumentu gwomimvo 23 oshipotha shedhipago noshuulunga sho anuwa a dhipaga omukiintu gwomimvo 32 noku yaka mo iinima oyi ndji megumbo moka a li a kutwa onga omuniilonga moshikunino.
Omukwatakanithi koshikondo shoku konaakona iimbuluma mOshikoto, Deputy Commissioner Titus Ekandjo okwa hokolola kutya oshiningwanima shika osha holoka lwopotundi 11h00 moTsumeb.
“Nakusa ngoka e li omukwanezimo womugandji gwiilonga ngoka anuwa okwa adhika, a lala, a sa, e li mekungu lyombinzi, nokandunda kokupungula e na ombele ya ndjika ma mepepe lyokolulyo,” Ekandjo ta hokolola.
Ekandjo okwa hokolola kutya omukiintu okwa li megumbo ta yogo iikutu omanga omuniilonga gwomoshikuninino a li pondje na ye ta kongo. Mwene wegumbo ye okwa adhika a ya kiilonga
“Omuntu gumwe ha hiila megumbo moka, ngoka a li a za mo mondoolopa okwa galuka esiku ndjoka noku adha omukiintu ngoka a sa, nokanona ke komwedhi gumwe taka lilagana,” Ekandjo ta ti.
Iinima oyindji ya kwatela mo oongodhi dhopeke nooshapi dhegumbo okwa adha dha iwa nandho nomuniilonga moshikunino kali e wete mpoka te mu tsu.
“Mwene wegumbo okwa adhika e li kiilonga naanona ye oya li kosikola pethimbo lyoshiningwanima,” Ekandjo ta gwedha po kutya nakusa okwa li omupambele wamwene wegumbo. Olutu lwanakusa olwa falwa kokila yoshipangelo shaTsumeb luka ningilwe omakonaakono.
Omufekelwa okwa kwatwa po ongula yEtine a adhika kolukanda lwaTsintsabis nokwa holoka mompangulilo yaMangestalata gwaTsumeb mEtitano moka a tindilwa eifutilomo.
Moshiningwanima shayooloka, omunamimvo 29 okwa ikutha omwenyo sho i imangeleke ongula yEtine. Nakusa oye Paulus Soondaha Asino womomukunda Elombe mOshitopolwa shaShikoto. Nakusa nguka ina thiga a po okambapila ta ka hokolola kutya omolwashike a ikutha omwenyo.
Olutu lwe olwa li lwa fwalwa kokila yoshipangelo shaNandjokwe hoka tagu ningilwa omakonaakona, opo ku talike nenge ku kolekwe kutya oshietithi she so oshike. Aapambele yoonakusa miipotha ayihe mbika oya tseyithilwa, nomakonaakono gopolisi otaga tsikile.
-Nampa.