Omukiintu gwomimvo 32 okwa mangwa po nokupatulilwa oshipotha shedhipago.
Sha ikolela kolopota yopolisi yiinigwanina hayi holoka mehuliloshiwike, oshiningwanima shoka osha holoka uusiku wOlyomakaya molukanda SonSkyn kOmaruru.
Otaku hokololwa kutya omulumentu nomikiintu ngoka okwa li ya ninga ethimbo ya topoka pahole.
Opolosi oya ti omulumentu ngoka anuwa okwa li a ponokele omukiintu ngoka megumbo lyawo noku mu kondjithila mondandu ye yokulala.
Tayi hokolola kutya pethimbo taya kondjo ngaaka omukiintu ngoka nelalakano lyokwiigamena okwa li a kutha ombele noku mu tsa mothingo.
Omulumentu ngoka okwa li a si ethimbo olyo tuu ndyoka, nomukiintu ngoka okwa li a tseyithile aashiinda mboka yali yandhengele opolisi.
Nakusa okwa tseyika nendhina Markus Whayne Ulrich
oshiwike sha zi ko natango omwa holoka edhipago pokati kookuume yomiihole sho omukiintu gwomimvo 31 a si eso lyi nyanyaleka sho a dhengagulwa noshitenda kukuume ke komiihole omanga inaa imangeleka.
Komufala gwopevi gwopolisi moshitopolwa shaMusati Moses Simao okwa ti, oshiningwanima shoka osha holoka mehuulilo lyoshiwike sha za ko, momukunda Okapya kaMbidhi.
Otaku hokololwa kutya omukiintu ngoka nomulumentu gwe okwa li ya monika taya nyenyeta uusiku wOlyomakaya sho omulumenutu ngoka a tameke okudhengagula omukiintu ngoka sigo a tatuka omutse.
Okuza mpoka okwe mu tsilike moombuli dhondunda nondhalate, e te mu mangeleke.
Otaku hokololwa kutya omukiintu ngoka okwa li ha longo megumbo moka lyaakuluntu yanamumati.
Omulumentu ngoka okwa mangwa po.
Natango omukiintu gwomimvo 28 okwa li a si eso lyi nyanyaleka sho a tsuwa iikando oyindji nombele kukuume ke komiihole oomwendhi dha piti.
Sha ikolelela komugandji gwomauyelele gwopolisi moshilongo Inspector Raimbert Muronga oshiningwanima shoka osha holoka molukanda Telecom moshitopolwa shaOtjozondjupa.
Otaku hokololwa kutya omukiintu gwedhina Aguste Jonas okwa li a tsuwa nombele iikando oyindji olutu aluhe.
Omukiintu ngoka anuwa okwa li a tsuwagulwa sho anuwa a adhika nomulumentu gumwe mondunda yokulala komulumenhtu gwe omukulu.
Shoka anuwa okwa li sha eta enyenyeto pokati kookuume mboka, nopethimbo lyiikolokosha, omulumentu ngoka okwa kutha ombele nokutsa omukiiintu ngoka.
Omukiintu ngoka anuwa okwa si ethimbo olyo tuu ndyoka.
– vkaapanda@nepc.com.na