Opolifi moshitukulwa shaShikoto otai kongo omulumenhu vati a denga omukainhu waye fiyo omefyo pefimbo kwa li tava di keendingosho. Oshiningwanima osha ningwa Osoondaxa efimbo lokomatango momukunda Onankali moshikandjohoololo Onyaanya.
Nakufya okwa tongololwa oye Hileni Mbango omukalimo womukunda Onankali.
Omufekelwa oku na eedula 40 omukwashiwana Omuangola.
Inspekta wopolifi Raimberb Muronga okwa hokolola ta ti omufekelwa okwa faduka po konima eshi a longa oshimbuluma.
Otaku hokololwa kutya ovaholafani ava okwa li tava ende va uka keumbo ashike fiyo opapa kape na ouyelele kutya Mbango okwa dengifwa shike.
Opolifi otai indile moshiwana kwaau e na ouyelele kombinga yomufekelwa opo shi lopotele opolifi keshe i li popepi.
Oshiwana otashi kumaida opo shi twikile okulongela kumwe nopolifi okuyandja ouyelele kombinga yovanhu tava longo oimbuluma. Oshiningwanima shikwao, omulumenhu okwa lopotwa a xulifa eshi a pila mobashu yaye.
Oshiningwanima osha ningwa modoolopa Aussenkehr efimbo loufiku lwopotundi 01h30 Etivali.
Nakufya okwa tongololwa oye Willem Shiyoleni weedula 27.
Otaku hokololwa kutya pefimbo loshiponga shomundilo efiku olo omaumbo e dulife 30 okwa pya po filufilu konima eshi omundilo wa tandavela okudja keumbo laShiyoleni.
Ovanhu ova fiwa pomutenya konima eshi omaliko avo a pila meenduda ashike kape na omunhu a lopotwa a monifwa oshiponga, kakele kwaau a xulifa.
Opolifi oya ti fiyo opapa kape na ouyelele kombinga yoshietifi shomundilo.
fhamalwa@nepc.com.na