Festus Hamalwa
Omunyeumbo weedula 57 okwa dipaa omukainhu waye nondjebo ndele naye mwene te lidipaa komukunda Oshihepo moshitukulwa shaHangwena.
Oshiningwanima eshi osha ningwa Etivali nEtitatu efimbo lokomatango meumbo lavo. Omunyeumbo okwa tongololwa oye Shikemeni Ndinomayele omanga omukainhu oye Teopolina Matheus weedula 43.
Omupopiliko wopolifi moshitukulwa shaHangwena Sergeant Andreas Nghiyolwa okwa hokolola ta ti omukulukadi okwa li tava tanguna nomushamane waye eshi kwa li tava di keendingosho.
Okudja opo Ndinomayele okwa kufa ondjebo ndele ta yashe omukulukadi waye loikando ivali, e mu yasha monhulo nomedimo pefimbo eshi kwa li ve li mondjila va uka keumbo.
Nakuninga oshihakanwa okwa twalwa koshipangelo shEenhana nokonima yefimbo okwa tuminwa koshipangelo shaNandjokwe shaashi okwa li e li monghalo itai nuwa omeva.
Opolifi oya ti efiku tuu olo eshi a fika mOnandjokwe okwa xulifa efimbo lokonguloshi. Konima eshi a yasha omukulukadi waye Ndinomayele okwa faduka po nondjebo yaye a uka moixwa.
Opolifi oya kala ye lipyakidila noku mu konga, nokonima okwe ke lituwa Etitatu monduda yaye yokunangala e li mexungu lohonde eshi e liyasha vati yemwene nondjebo yaye. Omakonakono opolifi otaa twikile.
Opolifi onghee tai kunghilile oshiwana unene tuu ovaholafani opo va kale tava kongo omakwafo kovaxungimwenyo, kovafitaongalo ile va shivifile opolifi ngeenge tava hepekwa koupyakadi wopamadilaadilo shaashi okudipaa ile okukufa omunhu omwenyo kaku shi ekandulepo lomukundu.
– fhamalwa@nepc.com.na