Omulumenhu weedula 33 okwa xulifa mexuliloshovike konima eshi vati a tuwa nombele kukaume kaye pefimbo kwa li tava li okapana peendingosho.
Oshiningwanima osha ningwa momukunda Omungwelume moshitukulwa shaHangwena efimbo loufiku.
Nakufya okwa tongololwa oye Sakaria Kuutondokwa omukalimo womOmungwelume.
Omukulunhu koshikondo shokukonakona oimbuluma mopolifi mOhangwena, omupedukomufala Zachariah Amakali okwa hokolola ta ti omufekelwa weedula 22 okwa hanga Kuutondokwa ta li okapana nomumwainakadona nokudja opo okwe mu twa nombele momutwe.
Opolifi oya hokolola tai ti vati omufekelwa okwa kala nale e kwetele Kuutondokwa onghone shaashi naye okwe mu twile nombele. Oshiningwanima eshi nasho osha ningwa neudo, ashike efiku inali popiwa.
Otaku hokololwa kutya ovalumenhu ava ova kala shito hava tanguna ngeenge va shakena.
Kuutondokwa okwa ka xulifila koshipangelo shaShakati.
Omufekelwa okwa kwatwa po nota pangulilwa oshibofa shedipao nomakonakono opolifi otaa twikile.
Opolifi onghee ngaa tai kumaida oshiwana opo shi xulife po okuhumbata oilwifo ngeenge tashi yi keendingosho molwaashi osha nyika oshiponga ngeenge omunhu a kolwa e na oshilwifo.