Victoria Kaapanda
ONGWEDIVA-Iihokolola moka omukiintu nomulumentu yomoshitopolwa shaNgwediva yi ifala kohofa, oya li ya undulilwa ko25 yaKotomba nuumvo.
Victory Katamba naLiitha Iiyambo oye na oompangu tadhi tsikile sho anuwa Katamba a popi Iiyambo ngoka a li gwe, noya kala pamwe uule womvula yimwe, kutya oku na omukithi kagu na epango.
“Iiyambo okwa tikile ndje ashike oohapu sho nda ti natu topoke. Naandhoka okwa li nde dhi mu lombwele sho nda loloka kokuthiminikwa kutya natu hokane, aniwa oshoka okwa hala okugwedhelwa kondjambi ye yokomwedhi kiilonga,” Katamba ta ti ngaaka.
Ta gwedha po ta ti Iiyambo ngoka ha longo onga omupangi gwomomikunda, okwa kala nokukondjitha ya hokane ihe ye (Katamba) ina tokola okuya mohombo, nosha kala tashi mu nyenyetele kehe thimbo, ta ti okwa kala ina manguluka unene ngele te ya megumbo.
Katamba ta ti yo kaye na nando okanona kamwe naIiyambo, nokwa li a ningi etokolo opo a laleke omukiintu ngoka mo2017, oshoka shoka te mu kondjithile ine shi hala.
Ta popi ta ti okuza mpoka yo naIiyambo oya kala ye na oontamanana nomahokololo ogendji pokati kawo sigo Katamba a mangwa po kopolisi mo2017. Sho sha etitha opo omulumentu ngoka a mangwe po oosho aniwa a tumine Iiyambo etumwalaka kutya oku na omukithi kaagu na epango.
“Shoka sha li sha tulitha ndje modholongo kashi na uushili washa, ihe okwe dhi totopo ashike sho inandi mu hala we, ashike oye a kala nokulombwela ndje omahokololo gaamboka ha kwathele onga omupangi gomomukunda, ye na omikithi ihaa dhi pangwa,” Katamba a yelitha.
Katamba ta ti, ye okwa hala ashike Iiyambo, e mu kale kokule ye a tsikile onkamwenyo ye ompe kaayi na oontamanana nomahilathano, ta ti ine mu lundila we, naya topoke ashike nombili.
Iiyambo ngoka a yambukile momukunda Eko lyaNaambo, moshitopolwa shaShana, kakwa li ta monika koshifonkundaneki shika opo a tye ko sha kehokololo ndika. Katamba okwa yambukile momukunda Omashekediva mOngwediva.