Okaana kokakadona keemwedi 11 oka fya konima eshi vati ka fangwa kuxe oo kwa li ta denge omukainhu waye –ina yokaana Oshiningwanimwa osha ningwa mexuliloshivike komukunda Omauni moshikandjohoololo shaKongo, moshitukulwa shaHangwena.
Opolifi oya hokolola tai ti omufekelwa weedula 40 okwa li ta denge ina yokaana pefimbo kwa li tava di keendingosho eshi omalunha amwe a ka kwatela mo nokaana.
Otaku hokololwa kutya ovadali vokaana ova uhala keendingosho tava nwine pamwe fiyo tava tameke tava tanguna.Omukulunhu wopolifi koshikondo shokukonakona oimbuluma mOhangwena omupedukomufala Amakali Zachariah okwa hokolola ta ti omufekelwa okwa tamaka tete okudenga omukainhu waye nokonima okwa tameka okulyata omona neenghaku. Omufekelwa okwa kwatwa po nota holoka momhangu nena. Oshiningwanima shikwao, ovalumenhu vavali Ovaangola ova kwatwa po konima eshi vati va hangika noilwifo motuwa yavo Omaandaxa kOutapi efimbo lokomatango.
Omukulunhu wopolifi moshitukulwa shaMusati Komufala Ismael Basson okwa hokolola ta ti ovafekelwa ova hangika va yuka kOtjiwarongo tava ka dipaa eemhanda. Ava vati ova hangika noilwifo ngaashi eendjebo nomakatana.
Okwa ti ouyelele owe uya kombada konima eshi ovanambelewa vokeengamba va londwela opolifi.
Nokudja opo opolifi oya ninga einda mondjila pokati kOutapi nOshakati nokuningila otuwa yovafekelwa omapekapeko fiyo tava kwatwa po.
fhamalwa@nepc.com.na