Taimi Haihambo
Velemina Amadhila omunamido 21, okwati yee okuna oshitalendi shokuhondja osho shemu findanifa onga omuhondji dingi komafiyafano opombada moshilongo taa ifanwa National world skills.
Molwaashi eenghono omwene, shoo oshitalendi vati omohonde, Amadhila okwa tokola eke lihongele oku hondja koshiputudilo shopombada sha Valombola vocational training center mOngwediva.
Vati koshiputudilo okwa yako odula yadjako, koo oko amonena omhito yokukufa ombinga momafiyafano oNational World Skill omwedi wadjako.
“Tete kashali shipu unene tuu ondjila yomadeulo oku hondja ei twa enda kofikola. Oko kutya ngoo ondali ndili modula yange yotete, hano ndi mu pe mofikola, naashi nda hoololwa kutya aame handi ka kufa ombinga momafiyafano oWorld Skills , onda li nda hafa, ashike okwali yoo ndi na oumbada,” ta ti.
Vati konima eshi a findana epapa laye, okwa kala teshi endifa nawa, shoo vati osho she mu pa omukumo kutya oshina okweenda nawa ashike.
Amadhila okwa ti okuhondja oshiima shimwe a dja teshi ningi peedula dishona elela.
“Onda kala nda tuwa omukumo unene kumeme wange shaashi omuhondji woikutu kamana,” ta ti.
Vati natango okwa kala hatale ovahondji vanene moNamibia ngaashi o Scholtz Rubrto, Kassely the designer nava kwao vahapu.
Mokukufa ombinga momafiyafano oNational World Skills, Amadhila vati okwa findana ombadi yoshingoli noN$ 15 000.
Shaashi nee vati oha kala a taalela omashongo ngaashi oiyata yokuhondja noilongifo ikwao yawedwa po, oimaliwa yaye oyo a findana neenghono daye vati oina okumukufa koshi.
Okwa ti ota kunghilile ovanyasha vakwao va shikule eendjodi davo ndele tave lihongele eshi vehole.