Okanona komimvo 9 oka dhipagwa ku walye, e taka fumvikwa momuti gwaandjawo ombinga yolutu, sha ningila moshitopolwa shaMusati.
Sha ikolela kuuyelele wa gandjwa komukuluntu gwopolisi moshitopolwa shaMusati Titus Shikongo, oshiningwanima shoka osha holoka oshiwike sha zi ko momukunda Ondjungulume moshikandjohogololo shaTamanzi.
“Okanonamati hoka anuwa oka li ka dhengwa moshipala kombinga yokolulyo noshinima kaashi shiwike nokwa li ka fumvikwa ombinga yimwe yolutu,” ta hokolola ngaaka.
Ta ti, okanonamati hoka okwa li ha kazi pamwe nayinakulu oshowo okamwayinamati komimvo ne.
“Otwa lopotelwa kutya omukulupe ngoka okwa li a thigimo aatekulu ye, ayi kopenzela hoka a li natango a galuka ko esiku olyo tu ndyoka,” ta ti ngaaka.
Otaku hokololwa kutya omukulupe megumbo okwa li aadhamo ashike okanonamati komimvo ne, hoka ka li ka lopotele yinakulu kutya mumwayinamati megumbo okwiiyakamo.
“Shoka kwa li sha kongitha omukulupe egumbo a lihe, ye ta igidha edhina lyanakusa, ihe okwa li a huulile muunyengwi. Esiku lya landula omukulupe okwa li a tsikile okukonga,” ta ti ngaaka.
Shikongo ta hokolola kutya omukulupe sho kwa li atsikile okukonga omutekulu gwe, ye ta dhingoloka egumbo lye, okwa li iitsu molutu lwa fumvikwa ombinga yimwe memvi kohi yo mugongo gu li pooha dhe gumbo lyawo,” ta popi ngaaka.
Ta ti, omukulupe okwa li a tseyithile aashinda she mboka kwa li ya tseyithile opolisi meendelelo.
Ngoka alongo iiloga mbyoka yi nyanyaleka ina tseyika natango.
Nakusa okwa tseyika nedhina Tuhafeni Malakia ayambukile momukunda omo tuu moka.
Aakwanezimo oya tseyithilwa nomakonakono gopolisi oge li metifa, okukonankona oshipotha opo ku vule okumangwa ngoka a longo iilonga tya ngaaka.
Opolisi oya ti, okanona hoka ka li na mumwayina megumbo inaka gandja uuyelele natango, tau vulu okukonakonitha oshipotha shoka.