Olutu lomulumenhu ola hangika mondingosho lili mokila yokukala omalodu Osoondaxa mokati efimbo longula kolukanda poSoweto moWindhoek ponhele yomangeshefelo yedina Herero Mall.
Nakufya ota ku hokololwa kutya omukwashiwana womuAngola a kala ha longele mondingosho omo a fila, ye omo yoo ali ha nangala.
Omupopiliko wopolifi moNamibia Deputy Commissioner Kauna Shikwambi okwa hokolola ta ti nakufya okwe li xulwa okumonika Etitano efimbo lokonguloshi kumumwainamati pondingosho ili poHerero Mall yedina Okamuinyo omo ali ha nangala.
Shikwambi okwa ti efiku tuu olo konguloshi nakufya okwa kanangala oyeke mondingosho, omanga vamwainamati vatatu vaka nangala pondingosho ili popepi nai kwa li mwa nangala nakufya.
Vati ongula eshi kwa sha vamwaina inava ka tala ngeenge omo ngaa eli mondingosho ile pamwe okwa dja mo.
Okwa ti omulumenhu ou kali a monika Olomakalya fiyo Osoondaxa, omo ovanhu vaka tamwka oku limbililwa unene shaashi ka kwali veshi kutya okuli peni. Opolifi oya ti Osoondaxa efimbo longula ovanhu ova uda edimba loshiima tashi nyika sha ninga nai tali di mondingosho omo hamu nangala omulumenhu.
Vati ovanhu ova ninga onghendambala opo va teye po omuvelo wondingosho opo va tale kutya omuna shike.
Nokonima eshi vamwaina va patulula po ova hanga olutu lanakufya lili mokila yokutula omalodu la ninga nai.
Vati mokila omu mwa hangika nakufya ka kwali ya tulwa kolusheno, onghee vati ka kwali tai longo efimbo olo ovanhu va hanga mo olutu laye.
Ovanhu ova shiivifila opolifi yomoshilando kombinga yoshiningwanima eshi sha tilifa ovanhu unene. Vati opolifi eshi ya fika ina i mona ouyelele woshitifi shefyo lamulumenh ou. Opolifi oya ti omakonakono opolifi ota twikile, novakwapata vaye vokoAngola inava shiivifilwa manga efyo laye.
Opolifi otai indile moshiwana kwau e na ouyelele kombinga yefyo lomulumehu ou opo shi kale sha lopotela opolifi keshe ili popepi. fhamalwa@nepc.com.na