Victoria Kaapanda
Olutu lwomulumentu omunamimvo 30, olwa itsuwa mehala lyohiila lyoondunda dhokulala, ano obed and breakfast mOngwediva.
Otaku hokololwa nakusa nguka Richard Megameno Namwandi e li omwanamati gwaDavid Namwandi ngoka oye mwene gwoshiputudhilo shoInternational University of Management (IUM) nokwa li wo ominista yelongo.
David Namwandi okwa tumbula omona gomumati onga kwa li omulumentu gomwenyo omwaanawa oshowo omunankondo.
“Oshidhigu okutaamba ko. Pethimbo ndika itandi vulu okupopya oshindji,’’ ta ti ngaaka.
Namwandi sho a pulwa ngele omona okwa kala a taalela uupyakadhi wontumba taku tengenekwa wa etitha oshiningwanima shika, kakwa li a ti ko sha.
Ta ti, natango inaya thika ponkatu yokulongekidha efumbiko.
Sha ikolelela komugandji gomauyelele gwopolisi moshitopolwa shaShana Thomas Aiyambo oshiningwanima shoka osha holoka Omaandaha lwopotundi 21h00 mehala tali ithanwa Electronic Guest House mOngwediva.
Otaku hokololwa kutya omulumentu ngoka okwa li a indile okukala mehala moka okuza momasiku 30 gaSepetemba nuumvo.
Aiyambo okwa ti, omulumentu ngoka kakwa li a thigi a shanga shoka sha etitha a imangeleke.
Omakonakono gopolisi oge li metifa.
Moshiningwanima inaashi faathana, omulumentu gomimvo 24 okwa si eso lyi nyanyaleka sho a gwilwa kevi, pethimbo kwali taya longo pamwe nayakwawo, ye li yatatu mboka kwali ya ehamekwa no ye li monkalo tayi etitha oonkondo.
Aiyambo okwa ti oshingwanima osha holoka Omaandaha molukanda Sky mOngwediva lopotundi 15h00.
Otaku hokololwa kutya aalumentu mboka okwa li taya the omukanka gotula gwominino, sho evi kwali lya gwile kuyo ayehe yeli yane.
Opolisi inayi tothamo kutya aalumentu mboka okwali taya longele ehangano lyini.
Ya gwedhapo kutya omulumentu ngoka ka kwali eshi pondola okuzako kohi yevi ethimbo ndyoka, omanga ya kwawo mboka yatatu kwali ya ka mona uuhaku meendelelo.
Aalumentu mboka yeli yatatu oyeli monkalo yili nawa
Caption: Omunamimvo 30 a si sho i imangeleke mohotela yimwe mOngwediva
Ethano ota li ulike ashike