Auleria Wakudumo 

Omulumenhu weedula 57 okwa kanifa okuulu eshi a wilwa koshitenda shokutumba oinima idjuu.

Festus Shaningwa omukalimo wOnetemba popepi nOndangwa omunailonga wopOtam Check tyres mOndangwa momafiku 28 Aguste okwa penduka ongula ngaashii naana heshi ningi shito, aye koilonga, ashike ina a lukila vali keumbo ngaashi a ile koilonga.

Shaningwa oha pangele omataiyela pOtam Check tyres, ta lape, ta kufa ko nokutula ko omataiyela keetuwa. 

“Okaloli kaKambwa okeya okulapwa elola ngaashi ashike eetuwa adishe ha diya okupangelwa, Shaningwa ta hokolola.  Manga a pwila mo ta lape elola, okwa mona ashike vati ondjudo ya wa kokaloli.  

“Eshi nda ka kendabala okufaduka po, okaulu kange oko ashike ka dengwa okudja pongolo fiyo okomhadi, Shaningwa ta ti. 

Omanga inaya koshipangelo, Shaningwa okwa ti ka li ena eineekelo kutya ota tulwa nande omosamende shaashi vati okaulu oka nyanyaulwa filufilu kondjudo. 

Eshi aya koshipangelo, okaulu oka fikila vati ta ka tetwa ko. okwa ti omanga eli moshipangelo, kapena ekwafo lasha a mona okudja komuyandji waye woilonga ile okudja kuKambwa Trading cc. 

Onda kanifa okaulu shili, ashike ohandi pandula Kalunga eshi ndina omwenyo. Shaningwa okwa ti otashi dulika a kanife oilonga shaashi oilonga yotulako, okundjeka oshoyo okulapa omalola eetuwa vati oidjuu. Nande ongaho, ota ti ota tale ngeenge ta kala xwepo opo a ikilile ongalo omo eli paife. 

Otam check tyres 

Otam Check oya ti oya twala Shaninngwa koshipangelo ashike ina i ninga ekwatafano naye shaashi moshipangelo okwali mo oye auye ye kali monghalo ili nawa. 

Nande ongaho, Shaningwa natango vati okuli momwenyo nehangano olili metifa okuyandja omayakulo kuye. Ekwafo letu ota li li kwatelele kenyamukulo landokotola. Ndokotola ngeenge okwa ti Shaningwa ota dulu okutwikila oilonga, nena ehangano ota li twikile okulonga naye, ashike ngeenge ndokotola okwa ti ita dulu vali okutwikila oilonga nena ohatu tale ngaho kutya ohatu mu kwafele ngahelipi,” Omupopiliko wOtam Check ta ti. 

Kambwa Trading cc

Omunangeshefa woKambwa Trading, David Kambwa Sheehama okwa ti voo ova twala ashike ololi kongalashe i pangelwe. okwa ti ondjudo vati iha i patelwa kokaloli, na nakupangela okwa ndjeka ponhele ya puka.  “Ngeno okwa li omunailonga wange, ngeno ohandi mu tumu koSocial Security shaashi okwa monena oshiponga moilonga ashike paife ongalashe kaifi yange nekaloli kange oka li ashike kaya kongalashe,” Kambwa ta ti. Kambwa okwa weda po ta ti mwene wonhele yokupangela oihauto okwa li ena okuyandja eetundi kovanailonga kutya eetuwa ohadi djekwa peni. 

-wakudumoauleria@gmail.com