Omukainhu weedula 26 vati okwa kengelelwa oshimaliwa shi dulife poN$190 000 kuLusty Serious Nekundi (28) oo e li omufita wongeleka yoshiveva i li mOutapi.
Omupedu Commissioner Andreas Johannes koshikondo shokukelela oimbuluma moshitukulwa shaMusati okwa koleka ta ti omufita ou okwa patululilwa oshibofa kOutapi.
“Opolifi oya ninga onghendabala yokukonga omulumenhu ou opo a kale a kwatwa po diva ashike okwa dja mo modoolopa,” ta ti.
Johannes okwa weda po ta ti ovakonakoni vopolifi ova kwatafana nahaende womufekelwa ou.
“Haende waye okwa lombwela opolifi ta ti oye mwene ta twala omufita kopolifi nena. Ota ka holoka momhangu yaOutapi,” ta hokolola. Nakuninga oshihakwa okwa hokolola ta ti omudo wa dja ko muAguste okwa li e na ongeshefa osho sha eta opo a pewe omayele kukahewa kaye opo a ye kongeleka a ka ilikanenwe.
“Onda ya kongeleka. Omufita okwa pula nge ndi fute oshimaliwa sheeN$400 opo a ilikanene nge. Onda futa oshimaliwa osho a pula,” ta hokolola. Okwa ti konima yomwedi okwa dengelwa ongodi komufita ta pula ngeenge ongeshefa yaye otai ende nawa.
“Onde mu lombwela kutya ongeshefa otai ende nawa, noshimaliwa shange shoN$250 000 osho nda li ndi na okufutwa kepangelo oshe ya,” ta ti.
Vati mokuuda ngaho, omufita okwa pula omukainhu e mu pe eendjo doN$60 000, a ka lande omambako ongeleka.
“Okwa ti oshimaliwa shange ote shi shunifile nge,” ta ti. Omukainhu okwa ti omufita okwa twikila noku mu pula oimaliwa oikando ya yooloka fiyo ya fika poN$250 000. “Oha lombwele nge ta ti inandi pumbwa okutila molwaashi oshimaliwa shange ite shi shunifile nge,” ta hokolola.
Okwa hokolola ta ti efiku limwe okwa ka pula omufita opo e mu shunifile oshimaliwa shaye ashike okwe mu lombwela kutya ina wanifa manga. Ohaluka, vati omufita okwa tameka oku mu ningila omatilifo edipao.
“Okwa ti ota dipaa nge ndele te limangeleke. Okwa tameka okudima ongodi yaye ngeenge handi pula oshimaliwa shange,” ta ti.
“Onda twikila okupula oshimaliwa shange. Okwa lombwela nge ta ti ohandi dulu okukatala ko oinima oyo i li kongeleka yaye, ya landwa moshimaliwa shange.”
Konima yoku umba mo oinima mongeleka, omufita vati okwe likunda nohonda yaye yomupolifi opo va patululile nakuningilwa omunyonena oshibofa shoipupulu, ve shi ningila keumbo lomufita.
Omufita ou pamwe nohonda ova patulula oshibofa tashi ti kutya nakukengelelwa okwa teya ongeleka ndele ta vake mo oshimaliwa sheeN$50 000. Opolifi oya ti oshibofa osha ekelwashi eshi konima kwa ka monika kutya oshibofa kashi na oushili. Eshi a kwatafana naKundana, omufita ou taku tiwa okwa kengelela omukainhu, okwe lipopila ta ti okwa pewa oshimaliwa komukainhu ou molwaashi okwa li ve li naye mekwatafano lopaihole.
“Okwe uya kongeleka ta pula ekwafo lomailikano. Okudja opo otwa ya naye mekwatafano lopaihole,” omufita te lipopile.
Omulumenhu ou okwa ti okwe li ongekida okukala a shunifa ko oshimaliwa shomukainhu ou. Oshikundaneki eshi osha kwatafana nomupolifi womukainhu ou taku tiwa okwa pangela omhangela yokupatululila nakuninga oshihakanwa oshibofa shoipupulu. Omupolifi ou okwa anya okutya ko sha kombinga yoshikumungu eshi.
Omupedu Commissioner Johannes okwa ti ovakonakoni vopolifi okwa li va ninga omutumba nomukainhu ou womupolifi.
“Okwa kunghililwa kutya nashi ninge shaxuuninwa okukala ta ningile ovanhu oibofa komaumbo pehe na oushili,” ta ti.
Kakukutu kopolifi Inspector General Joseph Shikongo okwa ti ombelewa yaye inai lopotelwa kombinga yoshikumungu eshi.
“Ohandi ka kwatafana nomukainhu oo a kengelekwa komufita,” Shikongo ta ti.
Okwa ti ombelewa yaye itai popile ovapolifi tava longifa oulingilingi.
Okwa weda po ta ti ovapolifi ova kutwa okulonga nouyuuki noshoyo okuulika oshihopaenewa shiwa moshiwana.