Auleria Wakudumo
Omukulupe weedula 60 opo ai mopeendjela okwa kanifa oshimaliwa N$824 050 kovafeekelwa veli ninga ovapolifi voipupulu.
Oshiningwanima osha ningwa pokati ko 19 June 2024 no 31 August 2024 pefimbo inali shiivika kofikola yokulilonga okushinga konima yoPick ‘n Pay modoolopa yaOutapi.
Omupopiliko wopolifi moshitukulwa shaMusati, Inspector Anna Kunga okwa koleka oshiningwanime eshi. Kunga okwati ovafeekelwa ova hanga omukulupe pofikola yokulihonga okushinga oko a ninga efimbo teli longo okushinga momukunda Ombongo moshitukulwa shaMusati.
“Ovafeekelwa pefimbo va hanga omukulupe oveli ninga vafa novalombwela omukulupe kutya voo ovapolifi ndele tave mu pula aye motuwa yavo,” Kunga tati.
Motuwa, ovafeekelwa ova pula vati omukulupe a yandje omaliko aye omo mwa kwatelwa ongodi yomukulupe yopeke. Ovafeekelwa vati ova pula omukulupe a yandje omaukwatya nomauyelele ombaanga pakulongifa ongodi yopeke. Omukulupe vati okwa yandja oinima aishe mwakwatelwa ouyelele aushe oo ha longifa wokombaanga pangodi.
Konima, ovafeekelwa ova longifa ongodi ndele tava nane oimaliwa oikando ihapu pokati komafiku 19 June 2024 no 31 August 2024 aishe kumwe ili N$824 050.
Kunga okwati omukulupe okudja fiku a kufwa oinima yaye mwa kwatelwa nongodi yopeke ina lopota oshiningwanima eshi shaashi vati okwa li e wete a yandja oinima yaye kopolifi yoshili na kakwali e wete pena epuko lasha.
Kunga okwa kunghilila oshiwana opo shi tulepo okuyandja omauyelele avo unene omauyelele ombaanga kovanhu.
“Inava yandja vali omauyelele avo kutya nee okovakwanedimo ile ovana vavo shaashi fimbo limwe ovanhu ava veli popepi navo ovo hava yandje ouyelele kookalyamupombo. Eshi ohashi ka monika ashike konima opolifi ya konaakona oimbuluma moule,” kunga tati. Kunga okwa yandja oshihopaenenwa shomukulupe ta pula kutya ovafeekelwa ova mona ngahelipi kutya omukulupe opo a peendjelwa nova mona ngahelipi kutya oha i keetundi dokushinga.
“Okwa wedapo tati ngeenge owa lomwelwa kutya omunhu omupolifi, neku twale ponhele opo ha longele ndele to pula ovanailonga pamwe naye. Oshiwana nashi kotekele ovo hava tula ovanhu moutoo tava longifa omikalo da yooloka,” Kunga ta ti.