Charles Ndeumane 

Omulumentu omukwashigwana gwaZimbabwe okwa dhipaga omukulukadhi gwe e ta idhipaga yemwene sho a dhenge ohauto moka ya li mololi. 

Omukiintu okwa tongololwa neddhina Lentina Pindura (34), omukwashigwana gwaNamibia, omanga omulumentu oye Kingstone Pintura (44). 

Opolisi moshitopolwa sha//Kharas oya lopota oshiningwanima shinyanyalitha sha ningwa mondoolopa yaKeetmanshoop uunambo. 

Otaku hokolwa omulumentu nguka a kutula omukiintu gwe omunino noku mu tsa nombele pethimbo lyoontamanana ndhoka dha tukuka pokati kayo manga ya li mohauto. 

Anuwa konima omulumentu ngoka naye okwa hingi ehauto lye ndele ete li dhenge mololi ndjoka ya li ta yi komeho nokwa sile pehala lyoshiningwanima. 

O m u p e v i k u l u n t u g w o p o l i s i moshitopolwa sha//Kharas Deputy Commissioner Nikodemus Mbango okwa ti opolisi oya adha aantu ayehe yaali ya hulitha nale onkene ina shi ndhidhilikwa natango kutya omukiintu okwa hulitha sho a tsuwa nombele nenge okwa hulithile moshiponga. Ta ti shoka ota shi ka tseyika konima yomakonakono. “Otandi fekele kutya omulumentu okwa li ta kambadha oku fala nakuninga oshihakanwa koshipange sho e mu tsu nombele ashike okwa mona kutya ngiika ita hupu nokwa tokola naye iidhipandje moku dhenga ohauto yowo mololi ndjoka ya li ta yi zi komeho,” Mbango ta ti. 

Anuwa omazimo agehe oga tseyithilwa, nomakonakono gopolisi ota ga tsikile. 

-mrndeumaneraycharles@gmail.com