Charles Ndeumane
Opolisi moshitopolwa shaHangwena oya lopota oshipotha moka omulumentu gwomimvo 22 a kwata okakadhona koomvula 17 koonkondo kena uunkundi wopamadhiladhilo ndele te ka thigi miihwa, moka ka adhika kwatwa po ombambyona komufekelwa omutiyali.
Oshiningwanima shoka osha ningwa momukunda Okakwa mOkatope.
Omukuluntu gwopolisi moshitopolwa shaHangwena Commissioner Ottilie Kashuupulwa okwa koleke uuyelele mbuka.
Ota ku hokololwa omufekelwa a kutha mo ombele eta ningile okakadhona hoka omatilitho omanga inee ka longela iihuna yopaihulo.
“Nakuninga oshihakanwa okwa li a ya koshituthi shekoleko megumbo lyopuushiinda, moka ha mu zi omufekelwa gwotango. Omufekelwa okwe mu kutha mo megumbo te mu fala miihwa moka e mu kwatele koonkondo e te mu thigi mpoka,” osho Kashuupulwa a ti.
“Kakadhona okwa adhika po komufekelwa omutiyali ngoka e mu kutha po ta kala naye megumbo lye uule womasiku gatano.
Inashi tseyika natango ngele omufekelwa omutiyali naye okwa kwata nakuninga oshihakanwa koonkondo, ashike okwa patululilwa oshipotha shekwatepo ombambyona,” Kashuupulwa a tsikile.
Anuwa omufekelwa omutiyali okwa monika ta ende nanakuninga oshihakanwa popepi nehala ha li landa iitenda mOkakwa, naasho a mono kutya aantu oya fa ta ya konenene oshoka opolisi oya li ya pititha etumwalaka ta yi kongo kakadhona ngoka, omufekelwa okwa thigi po nakuninga oshihakanwa nokufadhuka po.
Kashuupulwa okwa ti omufekelwa gwotango ngoka e li omukwashigwana gwaAngola okwa kwatwa po, nomufekelwa omutiyali ina kwatwa po natango ashike oku shiwike naampoka ha zi.