Omulumenhu weedula 20 okwa kwatwa po eshi vati a kwata okatekulukadona keedula 11 onghonga meumbo.
Oshiningwanima eshi osha ningwa mexuliloshivike koGroot-Aub moshitukulwa shaKhomas ashike opolifi oya lopotelwa Omaandaxa.
Omupopiliko wopolifi moshitukulwa shaKhomas Warrant Silas Shipandeni okwa hokolola ta ti omufekelwa okwa li a fiwa meumbo omu hamu di okatekulu kaye pefimbo ovakulunhu va dja po.
Vati okudja opo omufekelwa okwa ufana okatekulu monduda ndele ta i nako moixulo.
Eshi ovakulunhu ve uya meumbo nakuninga oshihakanwa okwe va hololela kutya okwa longelwa oushada wopaixulo komufekelwa.
Ovakulunhu ova lopotela opolifi nokonima omufekelwa okwa kwatwa po nota pangulilwa oshibofa shekwatonghonga.
Nakuninga oshihakanwa okwa twalwa koshipangelo opo a ka ningilwe omakonakono opaunamiti shaashi vati okwa kala e udite ouwehame koilyo
yaye.
Opolifi onghee tai kunghilile ovadali opo vaha fiye vali ounona voukadona meumbo novalumenhu ovo ve na oukwatya wokukwata omunhu
onghonga.
Opolifi oya ti ounona voukadona nouvamati ova ninga oihakanwa paife vokukwatwa onghonga kovapambele vavo momaumbo eshi shi li tashi ulike efano lii moshiwana.
Oya weda po tai ti oshiwana nashi kale alushe shi na eenomola deengodi dopolifi efimbo keshe opo shi kale tashi lopota oibofa yomakwatonghonga pefimbo.
– fhmalwa@nepc.com.na