Omulumenhu weedula 24 okwa kwatwa po eshi a hangika ta landifa omudjalo wopolifi mOndangwa mEtivali.
Omukulunhu koshikondo shokukonakona oimbuluma wopolifi moshitukulwa shaShana, omupedu Commissioner Fredrik Ndjadila okwa hokolola ta ti omudjalo wopolifi owa vakwa meumbo lomupolifi konima yeemwedi mbali.
Otaku hokololwa kutya okudja opo opolifi oya kala nokukonga oinima ya vakwa fiyo omufekelwa ta kwatwa po melongekulokumwe lopolifi noshiwana.
Opolifi oya hokolola tai ti omufekelwa okwa tula komalungula ta kongo omunhu a lande po omudjalo oo.
Otaku hokololwa kutya umwe womukwashiwana okwa kufa ko ongodi yomufekelwa ndele te mu dengele kutya okwa hala okulanda omudjalo oo.
Opolifi oya ti omulumenhu oo okwa ya keumbo lomufekelwa opo a ka tale omudjalo a fa ngeno a hala okulanda.
Okwa lopotela opolifi nomufekekwa okwa kwatwa po nota holoka momhangu, ta pangulilwa oshibofa sheteo lomaumbo.
Opolifi oya hokolola tai ti omulumenhu umwe e shivike nawa naye ota ka kwatwa po mekwatafano loshimbuluma eshi.
Oshiwana osha kumaidwa opo shi lopotele opolifi kovanhu tava djala omidjalo dopolifi ndele ihava longele opolifi.
Okwa didilikwa ovanhu vamwe hava longifa omidjalo dopolifi okulonga oimbuluma nokukengelela oshiwana.
Opolifi oya indila oshiwana alushe ngeenge pe na umwe womukwapata wavo a xulifa kwa li ha longele opolifi opo shi twale ko omidjalo dopolifi.