Omukulupe gwomimvo 67 oku li moshipangelo monkalo ombwiinayi sho kwa li ta kondjitha okwiitsa nombele.
Omupevikuluntu gwopolisi moshitopolwa shaMusati Moses Simaho okwa ti, omulumentu ngoka okwa li a fike po egumbo lyakuume ke komiihole mOmandaaha goshiwike shika momundhingoloko gwoRuacana moshitopolwa shaMusati.
Simaho okwa hokolola kutya omukulupe ngoka okwa li a matuka po konima yokulonga oshimbuluma shoka, nokwa kala ta kongwa okuza esiku ndyoka sigo esiku lya landula ko.
Anuwa sho u uvu kutya ota kongwa kopolisi okwa tokola okwiikutha omwenyo andola.
Opolisi ndjoka ya li ya yamukula mbala sho kwa li ya lopotelwa mpoka ta dhumwa oya adha ti itsu noombele.
Okwa falwa mbala koshipangelo, hoka e li momake gopolisi.
Otaku hokololwa kutya iinima mbyoka ya pile megumbo oyongushu yi vulithe N$70 000.
Shoka osha holoka ashike esiku limwe komeho sho osikola yo-GT ya pi, ya fikwa kuwalye.
Aalongwa ye na uulema womeho oya thigwa powala sho ombelewa ya fikwa po kuwalye.
Omukuluntu gwosekundosikola yaGabriel Taapopi mOngwediva moshitopolwa shaShana, Eelu Sackaria, okwa ti, sigo onena kaye na uuyelele waangoka a fike nokuteyagula osikola yawo.
“Mboka ye shi ningi oyo ngaa ye shi etompelo kutya oye shi ningi nelalakano lyashike oshoka natango katu na uuyelele kutya olye a teyagula nokufika po oongulu dhosikola yetu,” ta popi ngaaka.
Ta ti, osikola oya pi ashike ongulu yombelewa yimwe, ndjoka yi li meni lyosikola, omanga omatungo ge li gane gali ga teyagulwa.
Eelu okwa ti, nonando oombapila odhindji odha pila mo nodha yonuka sho taku dhimwa omulilo, oombaapila dhomakonakono inadhi kana.
“Oombapila ashike oonshona dhaalongwa dhomakonakono dha yonagulwa, ihe iitsa ayihe oya adhika ya tumwa nale hoka yi na okukala ya tumwa, onkene kape na iitsa ya kana,” ta fatulula ngaaka.
Ta ti, mosikola omwa yakwa ookompiuta dhopeke, omanga dhimwe dha pila mo.
Ta gwadhepo ta ti, natango kena ongushu yoshimaliwa shiinima ayihe ya yakwa po noya pila mo. “Nonando a li u uvu omayinyengo tage mu limbililike, okwa li a talaatala ihe kakwa li a mono sha. Okwa li a adha ashike aalongwa ye li mongulu yimwe taya lesha,” ta popi ngaaka.
Ta hokolola kutya aalongwa nayo okwa li ya koleke kutya oya li ya mono omukeeleli gwomaliko ethimbo ndyoka.
Ta ti, nonando aalongwa nayo oya li yu uvu ewi lyomulumetu ta popi mongodhi, kakwa li ya ipyakadhila naye.
Opolisi moshitopolwa shaShana oya koleke kutya osikola yaGabriel Taapopi oya patulula oshipotha Omaandaha.
Omugandji gwomauyelele gwopolisi moshitopolwa shaShana Thomas Aiyambo okwa ti oshiningwanima shoka anuwa osha holoka koongulasha dhOsoondaha.
Otaku hokololwa kutya mboka ya fike nokuyaka, oya li ya nuka osikola, noompadhi sho kwa li dha landulwa inadhi ka monika we sho ya thiki poteya.
Opolisi otayi tsikile nomakonakono.
vkaapanda@nepc.com.na