OSHAKATI- Gabriel Teofilus weedula 29 ota hokolola nghene oshiponga sholusheno osho sha lemaneka olutu laye alishe sha fiya ofamili yaye pomutenya.
Teofilus okwa tambulilwa moshipangelo shaShakati okudja omwedi wa dja ko, eshi a mona oshiponga pefimbo kwa li a londa kombada yetungo ta xwikileko oitenda.
Oshiponga osho osha ningilwe momafiku 26 Novamba kOshikuku.
Pefimbo Kundana e mu talela po koshipangelo oshivike sha dja ko Teofilus okwa hokolola ta ti okwa mona oshiponga eshi oshitenda osho kwa li e kwete osha ku ma kongodi yolusheno oyo ya enda pombada yetungo.
“Onda pya olutu alishe mwa kwatelelwa oitopolwa yomedimo,” ta hokolola noshipala tashi di omahodi e li mombete.
Okwa ti paife iha dulu vali okufikama neenyala daye iha di longo vali, oshipala shaye oshi ashike sha xupa ko inashi mona oshiponga.
Teofilus okwa ti okwa li ha longele ehangano lokuxwikila lOkapyala Trading CC.
Mehangano e li okwa longela mo oule weedula nhano nokwa kala ta longo nondjungu oku li monena oshimaliwa shoyambidida ofamili yaye.
Ashike paife okwe li hanga monghalo omo iha dulu oku li kwafa mwene, vali moshipangelo omo eli iha mono omayakulo e li nawa.
Okwa nyenyeta ta ti ita pewa omayakulo opaunamiti awa koshipangelo molwashi vati oha pewa ashike eepela dopanado.
“Ngeenge hadi undulwa kokambete kovanailonga vomoshipangelo ohandi undulwa nai shaashi okambete oha ka ende ashike ta ka tengauka,” ta ti.
Omukulunhuwiliki woshipangelo shaShakati DR Ruben Kanime okwa koleka ta ti okudja ashike efiku lotete Teofelus aya koshipangelo okwa kala ta pewa omayakulo ma wa opaunamiti.
“Okwa kala a kondekwa kongudu yeendokoto novapangi tava ungaunga naye. Okwa kala a pewa omiti domalundi a yooloka,” Kanime ta ti.
Okwa weda po ta ti noipute yaTeofeulus oya kala tai tonatelwa nokutulwa omiti opo ouheyame uxwexwepalekwe.
Kanime okwa ti kombinga yokutundulwa nai ngeenge Teofilus e li kokambeta, okwa yelifa ta ti ondjila yomukala oyo hai longifwa okuenda outemba neembete oya ninga omalambo.
“Naashi oha shi eta opo efimbo limwe ngeenge omunaudu e li kokatemba ka kale ta ka ende nokutengauka,” ta ti.
Ovakwapta vaTeofilus ova ti ova hala oku mu twala koshipangelo koSouth Africa ile koipangelo yopaumwene opo a dule okutulwa ofiyo molwashi oya pya kolusheno.
Ova hokolola tava ti ova taalele eshongo loshimaliwa noku mu twala kondje yoshilongo.
Omukulunhuwiliki mouministeli wouhaku Ben Nangombe okwa ti ouministeli wavo ou na oshikefa shoshimalilwa sha nuninwa okuyambidida omunaudu ngeenge a pumbwa a pangwe koshipengelo shopaumwene ile kondje yoshilongo.
Okwa yelifa ta ti omunaudu oha yambididwa she likwatelela koudu waye.
“Ovakwapata nava kwatafane nombelewa yange ile yomukulunhuwiliki woshipangelo shaShakati opo tu kundafane nghene Teofilus e na okuyambididwa,” ta ti.
Okwa yelifa ta ti epangelo ota li twikile okuyandjaneka omayakulo opaunamiti ma wa koshiwana molwashi osha fimana.
Secilia Shiwedha ou e li omumwainakadona waTeofilus okwa tanga mumwaina ta ti oye ekundi yepata molwashi oha yambidida.
“Okuhole okulanda oikulya. Oha yambidida ngeenge tu na oivilo mepata letu,” ta ti.
Okwa weda po ta ti ka pena vali omunhu ta ka yambidida keumbo molwashi ondenga yaye oya lemana paife.
“Paife otwa taalela oluhepo. Ngeno ondenge yange kai lemanene,’’ ta ti.
Helungi Petrus noku li mwene wehangano olo ha li longele Teofilus, okwa ti paife oilonga mehangano itai longwa vali ngaashi kwa li shito molwashi Teofilus okwa mona oshiponga.
“Teofels a longo nelitulemo, ye okushi okuxwikila nawa. Okwa eta oyuuyemo yoshimaliwa mehangano letu molwoilonga yaye ya hokiwa kovanhu,” ta ti.
Okwa ti okulemana kwa Teofilus ota kushunifa oilonga pedu yomehangano laye.