ONGWEDIVA – Omulumenhu weedula 29 okwa tambulilwa moshipangelo shaShakati, a dengwa noikulumbwati kovakwashiwana, eshi vati a hangwa ta kendabala okunyeka omukainhu oimaliwa nongodi yaye yopeke. 

Oshiningwanima osha ningwa mexuliloshivike mOngwediva efimbo loufiku. 

Omufekelwa ou okwa dile komukunda Omungwelume koshitukulwa shaHangwena. 

Omupopiliko wopolifi moshitukulwa shaShana Inspector Frieda Shikole okwa hokolola ta ti omukainhu okwa li tadi koilonga kendiki lomangeshefelo loChicco Mall, eshi a nhukilwa kovalumenhu vavali ndele tave mu ningile omatilifo edipao. 

Omufekelwa umwe okwa nyekako ongodi yopeke osho sha eta opo omukainhu a kuwe mokule. 

Ovakwashiwana ova lotoka ndele tava kwata po omufekelwa umwe, omanga omufekelwa mukwao okwa faduka. 

Opolifi oya hokolola tai ti ovakwashiwana ove shi pondola okukufako ongodi nodjato yoimaliwa oyo kwa li ya nyekwa ko.

Ota ku hokololwa kutya konima eshi omufekelwa a dengwa okwa ya komukeleli womaliko oo kwa li ta longele pofitola i li popepi na po pa ningilwa oshikumungu eshi. 

Omukeleli womaliko okwa dengela opolifi nokonima omufekelwa okwa twalwa koshipangelo opo a ka mone epango lopaunamiti. 

Opolifi oya ti omufekelwa mukwao fiyo opapa ina kwatwa po. Nakudengwa vati ina hala okupatulula oshibofa noku li monghalo i li xwepo. 

Oshiningwanima shikwao, omulumenhu weedula 32 okwa tambulilwa moshipangelo moWindhoek konima eshi a tuwa nombele kohonda yaye yomukainhu. 

Oshiningwanima osha ningwa mexuliloshivike mOtjiwarongo efimbo loufiku.Omukainhu weedula 50 ou e li omufekelwa okwa kwatwa po. 

Ota ku hokololwa kutya nakuninga oshihakanwa okwa ya keumbo lomufekelwa ndele tava tameke okutanguna. 

-fhamalwa@nepc.com.na