Konima yoomwedhi dhontumba, Fillipus Sackeus (37) okwa kala mehala lyi ikalekelwa kiifudhitho tali ithanwa Intensive Care Unit (ICU) itaa popi, itaa inyenge nonando u uvite shoka tashi popiwa.
Methimbo lyuuwehame moka, Fillipus okwa tsakaneke kuume ke Albertina Inkono, ngoka omwedhi nguka ya tokola okuninga yamwe, sho taya ka hokanathana.
Sackeus okwa hokolola kutya aakwanezimo ye, okwa li ya hupula kutya ke na ko we omasiku ogendji a shune kuukwaaluhe oshoka monkalo moka a li oya li tayi shololitha noya noya nayipala.
Ta ti, okwa li a tandwa momutse iikando itatu, omolwuuwehame mboka wa li we mu adha, mboka wa etitha etando.
“Otandi dhimbulukwa nawa momumvo 2016, okwa li tandi longele koKhorixas nokwa li nda tuminwa kOndangwa niilonga, uule womasiku omashona,” ta hokolola ngaaka.
Ta ti, manga kwa li ye li moshigongi esiku limwe, okwa li a dhimbulula kutya ke uvite nawa, nokwa li a piti mo nokwa li a yi kondunda ye yokulala.
Sho anuwa a egulula ondunda ye, okwa li i ihata po.
Ta gwedha po ta ti, konima sho aaniilonga pamwe naye ya li ya dhimbulula kutya Fillipus okwa ningi ethimbo inaa ngaluka, okwa li ya ka tala kondunda,hoka ya li ya adha a ihata pevi.
“Okwa li nda falwa koshipangelo kOngwediva Medi Park, ihe kakwa li ndi shi mpoka ndi li. Itandi dhimbulukwa kutya onda yi ko ngiini. Omadhiladhilo gandje okwa li ga galuka konima yomwedhi,” ta ti ngaaka.
Fillipus ta ti, okwa li a hokololelwa koondohotola shoka sha holoka naashoka sh ina okuningwa nokutsuwa omukumo kutya uumbanda nau mu kale kokule, nan a itaale kutya moombete oku li mo ashike pakathimbo.
“Onda li nda itaala nokugandja ayihe miikaha yOmuwa, ashike onda kala ndi na omukumo kutya otandi aluka. Ashike osha li sha limbilike ndje okulala mombete yuuwehame, oshoka kakwa li nda taambelwa nale moombete,” ta ti ngaaka.
Ta ti, okwa kala omulumentu guukolele, uuna aakwanezimo ye taya yi kongeleka ye otayi a kanwe mo kashona kuukamba, ashike nena ota pandula Kalunga.
“Sho nda penduka, onda mono iipolondhindhi komutse oshowo mepunda lyandje. Nonando nda li mombete yuuwehame moka, okakalata kandje kokupangwa oka li ka pu ko, nokakwa li we te vulu okutsikila okuyakulwa moshipangelo shaMedi Park,” ta popi ngaaka.
Onkene okwa li a tuminwa koshipangelo oshinene shaShakati hoka a ka tsikila okumona uuhaku.
“Sho nda tuminwa kOshakati, kakwa li tandi vulu natango okupopya nokwiinyenga nonando ndu uvite ko shoka aantu taya popi,” Fillipus ta popi ngaaka.
Ta hokolola kutya, ota dhimbulukwa esiku limwe e li mombete moka, sho mwa li mwe ya omupangi gumwe ongula, ngoka a li e mu etele oshiyaha shomeya, te mu lombwele ta ti na iyoge omanga oondohotola inaadhi ya.
Ta ti ngiika kakwa li e na ontseyo kutya ita vulu okulonga iilonga mbyoka kuye mwene.
“Sho a galuka okwa adha inaandi iyoga, ye ta popi ta ti, oo! Ino hala oku iyoga? Oondohotola itadhi panga aavu ya nigila. Ohandi mu tala ashike ngame tandi imemeha nonando ehalo lyoku mu yamukula ondi lyi na, ashike itandi vulu,” ta popi ngaaka.
Mo2017, okwa li anuwa a lombwelwa kutya ota pewa okatemba, oshoka okwa aluka.
Ta ti osha li onkundana ombwaanawa, ihe kakwa li lela a nyanyukwa oshoka natango kakwa li ta vulu okupopya, no wa li e na omayipulo kutya kiilonga otaka shuna ko ngiini e li monkalo ndjoka.
“Konima yoshiwike shimwe, okwa li nda mono omagulu gandje taga inyenge, okwa li nda mono ewi lyandje tali endele ko nonando lya li lya gagala, te popi te kokoma,” ta hokolola.
Ta ti, okuza mpoka okwa Ii a yi popepi naKalunga, okwa kala noku mu hambelela, nokwa li a engene popepi naye.
“Ndika olyo kwa li ethimbo nda mono omuyalekwa gwandje, ngoka a kala pamwe nangeme sho nda kala nokutsikila epango lyandje moshipangelo shaMedi Park, moka nda li nda shuna, omolwomayambidhidho gomukiintu gwandje oshowo iilonga yandje,” ta pandula.
Fillipus okwa ti ondjila ndjoka a enda, kakwa li ompu, ihe okwa sindi uuvu mboka, nena okwa aluka.
Nena okwas huna kiilonga ye, nongaashiingeyi ota longekidha ohango yawo.
“Mboka haya popile oshipangelo shaMedi Park muuwinayi kutya ohamu sile aantu, otandi dhi koleke kutya kadhi shi dhoshili,” ta ti ngaaka.
Inkono omwedhi ngoka taka lundulukila kofani Sackeus, okwa ti, okwa tsakaneke omulumentu ngoka omanga e li natango muuwehame nokwa kala pamwe naye sigo a aluka.
“Otandi pandula aapangi, oondohotol naaniilonga yomiipangelo sho ya kala nokusila omusamane gwandje oshimpwiyu oshowo okuyakula ndje uuna aluhe tandi mu talele po,” ta popi ngaaka.
Ndohotola gwaSackeus gweyithano “Neurosurgeon”, Badra Aliou Kone, okwa li a fatulula kutya, omulumentu ngoka okwa li a tandwa iikando itatu, nokwa kala ta mono uuhaku konima a li a kala po hwepo.
Omuniilonga gumwe gomoshipangelo Medi Park okwa ti, otaya pandula Pamba, ihe natango otaya pandula wo omukiintu ngoka, sho a kala pooha naSackeus nokugandja omayakulo, omukumo sigo ya thiki pethimbo ndika.
– vkaapanda@nepc.com.na