ONGWEDIVA -Omulumenutu Omundowishi ngoka ngashiingeyi a edhililwa moshipangelo oshinene shaShakati, anuwa okwa tidhwa megumbo sho anuwa ta nyengwa okuyambidhidha omukiintu gwe, konima a kanitha oongeshefa dhe.
Omulumentu ngoka gwomimvo 63 gwedhina Ralf Gunter, ngoka kwa li mwene gwehala lyiikulya nomanwino Rossini mOndangwa okwa pewa anuwa ehala lyokuza mosaala yaantu ye na uunkundi wopamadhiladhilo sho a li a tidhwa megumbo komukulukadhi gwe.
Domas okwa popi kutya oya kala a hokana omimvo 10 nomukulukadhi gwe Lena Amukugo ngoka e li omukwashigwna gwaNamibia.
Ta ti, Amukugo okwa yambukile momukunda Onkuni moshitopolwa shaShana, noye na aanona yaali yomimvo omugwoyi oshowo heyali.
‘’Onda taalela onkalo ondhigu, omukulukadhi gwandje okwa tidha ndje mo megumbo oshoka kandi na we iiyemo yasha, nonando nda kala noku mu longela uuwanawa sho kwa li te vulu,” Domas ta ti ngaaka.
Ta popi ta ti, okwa ningi omutondi gomukulukadhi oshoka anuwa ke na sha.
Ta hokolola ta ti onkalo ndjoka e li muyo oya nayipala notayi mu etele omadhiladhilo gokwiikutha omwenyo.
“Ondi li mehala limwe naantu ye na uunkundi wopamadhiladhilo, ihe itandi ehama. Ehala ndika olyo ashike nda monenwa oshoka okwa li handi zi momapandaanda,” ta popi ngaaka.
Ta popi ta ti, okwa kala mehala ndyoka lyaantu ye na uunkundi wopamadhiladhilo okuza omumvo gwa yi muMaalitsa. Ta gwedha po ta ti, ohamono ashike shoo thewa uuna ta indile kaasanamutimahenda.
Domas okwa ti, ke na aakwanezimo e li mekwatathano nayo, ta ti oye ashike e li ko.
“Aanona yandje ihandi ya mono we, iihauto yandje oya landithwa po komukulukadhi gwandje, kandi na we nkene ndi na okuninga,” ta popi ngaaka.
Domas okwa fatulula kutya omaupyakadhi agehe okwa li ga tameke sho kwa li a kanitha ongeshefa ye, nomomasiku 15 Septemba okwa li a lalekwa mo megumbo.
“Kandi na nkene kwa li ndi na okuninga, ihe okwa li nda zi mo megumbo oshoka egumbo ndyoka kwa li hatu zi olyaapambele yomukukadhi,” ta popi ngaaka.
Ta ti, okwa li a thigi po oohauto dhe mbali ndhoka anuwa kwa li ta ti ote ya e dhi ile ko nale.
Domas okwa ti anuwa omukulukadhi gwe okwa li a landitha po oohauto ndhoka konima a li e mu tidha mo megumbo.
“Onda hala ashike oohauto dhandje opo ndi vule okulandithapo yimwe ndi vule okumona oshimaliwa ndi tameke oongeshefa dhandje oshowo ehala lyandje lyokuza,” ta indile ngaaka.
Ta ti, ina pumbwa iimaliwa oyindji, N$30 000, oya gwana.
Moonkundathana noshifokundaneki shika Amukugo okwa ti, ayihe tayi hokololwa komusamane gwe kayi shi yoshili. “Inandi mu tidha megumbo, ihe okwa li a yi nuuyuni we pethimbo a li e na iimaliwa. Okwa galukile ndje ashike sho kee na sha we oshimaliwa,’’ ta hokolola ngaaka.
Ta ti, omusamane ngoka anuwa okwe mu monitha iihuna noonkondo, okwa kala noku mu tuka ye ina kala anuwa e na naye.
Ta ti, okwa kala e li nookuume ke, sho a li e na iimaliwa.
“Na kale ha popi oshili. Omikalo dhe omiwinayi nomayihumbato ge ogo ge mu tula monkalo moka e li nena,” ta ti ngaaka.
Amukugo okwa ti, ina landitha po iihauto, ohauto ndjoka a li e na yeshete, okwa li e yi mu landela pevalo lye, ihe oya landithwa po.
Ta gwedha po ta ti uunona we ine wu fukwa, nomumvo gwa yi okwa li we mu talele po koshipangelo hoka ha zi.
“Kuuyelele mboka nda gongele po onda li nda lombwelwa kutya oha nu omiti dhaantu yaa na omadhiladhilo kaage li pehala, sho osho shoka e li kosaala hoka,’’ ta ti ngaaka.
Omukuluntu gwopolisi moshitopolwa shaShana Naftal Lungameni Sakaria okwa ti, oya kongele omulumentu ngoka ehala oshoka ke na mpoka kwa li ta zi.
“Omulumentu ngoka okwa patululila omukulukadhi gwe iipotha oyindji,’’ ta ti ngaaka.
Ta ti, ota kongo ekwatho moshigwana okuyambindhindhwa noshimaiwa opo a tameke ongeshefa ye.
Omukuluntunambelewa moshipangelo shaShakati Josephine Kanyama, okwa zimine kutya oya gandja ehala kosaala yaantu ye na omandhilandhilo kaage li pehala oshoko oko ye mu monene ehala.
“Oshi vulithe e li mepandaanda. Hoka e li ota iyogo, ota lala ye ota li. Shoka otwe shi ningi oshoka katu na egumbo lyoothigwa,’’ ta fatuula ngaaka.
vkaapanda@nepc.com.na