Omulumentu gwomimvo 28 okwa tulwa miipandeko mehuliloshiwike sho a dhengagula omutse gwokanona ke kokamati komimvo mbali moshitenda sha kukuta, sigo omutse gwa nyanyuka po.
Sha ikolelela kolopota yiiningwanima ya holoka mehuliloshiwike, oshiningwanima shoka osha holoka mondoolopa yOtavi moshitopolwa shOtjozondjupa.
Otaku hokololwa kutya omulumentu ngoka okwa li a yekula okanona momake gayina, e ta yi nako sigo okondjila yeshina lyokolutenda, hoka a li a dhengagula omutse gwako koshitenda sheshina lyokolutenda, sigo omutse gwa nyanyuka.
Otaku hokololwa kutya aakuluntu yokanona hoka kakwa li ya nyenyeta, onkene shoka sha etitha oshiningwanima shoka kashi shiwike natango.
Opolisi oya ti, omulumentu ngoka konima a mana okulonga iilonga mbyoka yi nyanyaleka, okwa li e ekelehi okanona, e ta fadhuka po.
Okanona hoka oka li ka falwa anuwa koshipangelo kOtavi tango, omolwuuwehame uunene ka mono oka li ka tuminwa koshipangelo oshinene kOtjiwarongo, hoka ka ka hulithila.
Omulumentu ngoka okwa li a mangwa esiku olyo tuu ndyoka.
Shika osha holoka ashike omasiku omashona sho opolisi moshitopolwa shOtjozondjupa ya ningi esiku tayi konakona shoka sha etitha omaso gaali, gomunamvo 21 ngoka taku fekelwa a pondo omona e ta imangeleke.
Sha ikolelela kolopota yopolisi yomehuliloshiwike, oshiningwanima osha holoka molukanda kwa li halu ithanwa nale Ombili.
Otaku hokololwa kutya omukiintu ngoka okwa li a pondo omona gwomimvo ntano tango, omanga inaa imangeleke, netompelo inaali tseyika.
Omukiintu ngoka a tseyika nedhina Hileni Vemujendavi okwa li a monika kukuume ke ngoka a li a adha i imangeleka nondhalate moombuli dhombashu ye.
Kuume ke anuwa okwa li a tokola okuthika pegumbo lye konima a li a limbililwa sho a kala nokudhenga ihe ita yamukulwa.
Sho anuwa a li a thiki pegumbo mpoka okwa li a kundwa kezimba edhigu ndyoka lya li lye mu limbililitha sigo ta ithana opolisi.
Opolisi oya li ya teya po omweelo nokwa li ya adha okanona ka lala pevi omanga olutu lwayina lwa endjelela moombuli.
Iiwike iyali ya piti, omukiintu gwomunyasha okwa li a mangwa po kopolisi moshitopolwa shaKhomas sho a li a dhengagula nokuponda omona gwomimvo ntano.
Opolisi oya ndhindhilike omahepeko gomomagumbo oshowo goomeme taga indjipala, nonando tayi tsikile okugandja uuyelele oshowo omalongo koshigwana nkene shi na okuninga aluhe sha iyadha shi li muupyakadhi.
vkaapanda@nepc.com.na