Auleria Wakudumo
Opolifi moshitukulwa shaShana otai kongo ovafekelwa vanhe eshi vati va nyeka omulumenhu weedula 26 eengodi dopeke 16.
Nakuningwa oshihakanwa okwa kanifa eengodi: iPhone 14 Pro Max, iPhone 14, iPhone 12 Pro Max, iPhone 12, iPhone Xsmax, iPhone XR, iPhone X, Samsung A16, Samsung S22, Samsung A73, Samsung Note 10, Huawei p30 Pro, Huawei p20 Lite, osho yo omakende okomesho neeshapi deumbo.
Eengodi adishe kumwe odi na ongushu yoshimaliwa shi fike po N$105 580.
Oshiningwanima eshi osha ningilwa molukanda Ehenye mOshakati, Etivali lwopo 19h00 lwaapo.
Omukulunhu wopolifi koshikondo shokukonakona oimbuluma moshitukulwahoololo shaShana Frederick Ndjadila okwa koleka oshiningwanima eshi.
Otaku hokololwa nakuningwa oshihakanwa a ponokelwa mokudja mokataksi oko vati ke mu kufa koilonga.
Opolifi oya ti, nakuningwa oshihakanwa okwa ponokelwa kovalumenhu vane, va dja motuwa yoToyota Corolla yonomola N 6317 SH konima eshi a tulwa poChristine Court.
Otaku hokololwa ve mu ningila omatilifo nondjebo ndele tave mu nyeke ondjato yaye oyo ya li i na eengodi 16.