ONGWEDIVA – Omukiintu gwomimvo dhopokati okwa li a gandja olupandu kOmusamalia Omunamutimahenda ngoka a li e mu toolitha ko koshimaliwa she, shoka a li a gwitha oshiwike shika. Ndapandula Daniel okwa ti, okwa li a kanitha okanayilona ke na oshimaliwa shoN$3 757 mOngwediva, no kwa li a ningi omunelago sho sha li sha toolwa po kuVaino Joseph ngoka e mu kongo sigo te mu mono. “Onda li nda gandja oshimaliwa shika oshoka mungame omweya edhiladhilo kutya oshi na okukala sha gwithwa komunasikola,” Joseph ta fatulula ngaaka. Ta ti, okukwathelathana okwa pumbiwa oshoka ngoka a kanitha andola okwa kala owala muupyakadhi woku ka konga oshimaliwa shoku ka futa oosikola.
Ta popi ta ti, kakwa li sha kwata ethimbo ele okumona Ndapandula Daniel ngoka e li shili omunasikola, nonande e na ngaa uulonga wontumba, oshoka oshigwana osha li sha kwathele mokwaandjaneka uuyelele. “Onda li tandi ende ndu uka kiilonga ethimbo lyongula, nokwa li nda tula oshimaliwa moondjato dhombulukweya yandje, nani oyi na ombululu ndjoka inaandi i mona,” Ndapandula Daniel ta hokolola ngaaka.
Daniel okwa ti, okwa li a dhengelwa ongodhi kutya iimaliwa ye oya monika, oya toolwa, naye e ke yi tale ko. “Onda li nda ningi onkambandhala opo ndi thike pomulumentu ngoka a toola iimaliwa yandje. Otandi pandula noonkondo oshoka mokanayilona moka omwa li mu na natango uuthemba wandje,” ta pandula ngaaka. Ta gwedha po ta ti, oshinima shi li ngaaka ihashi ningwa kukehe, onkene ota indile oshigwana shi kale nombepo ndjoka yi na omulumentu ngoka e mu toolitha ko. Ta ti, iimaliwa mbyoka okwa li te ke yi longitha okufuta osikola ye. Vaino Joseph ngoka a toolitha ko Daniel kiimaliwa ye, okwa ti okwa toola iimaliwa mbyoka Omandaaha mOngwediva, mehala tali ithanwa Oshana Mall. “Okanayilona sho nde ka mona, elago enene omwa li mu na okamutse ke koshilongo, osha li oshipu oku mu konga,’’ ta popi ngaaka.
Ta ti, okwa li a yi komalungula nokukonga omukiintu ngoka, a longitha edhina lye. “Shoka sha ningwa komulumentu ngoka osha pumba koshigwana, nongele oshigwana osha kala nonkalo ndjika yuumwayinathana otatu yi kokule,” gumwe ngoka a li a kwathele okwaandjaneka uuyelele a popi ngaaka.
vkaapanda@nepc.com.na