OSHAKATI – David Luqmaan weedula 28 okwe lifutila mo modolongo noshimaliwa N$4 000 konima eshi kwa li a kwatwa po a hangika nomandini omahooli e li 28.
Luqmaan oku li omukulunhu mofitola yoFrescho mOshakati nokwa kwatwa po oshivike sha dja ko pofitola yavo. Okwa holoka momhangu yamangestarata waShakati oshivike sha dja ko. Okwa hangika nomandini omahooli e li pongushu yoshimaliwa N$13 748, omahooli okwa kwatwa ko kopolifi.
Omukulunhu wopolifi moshitukulwa shaShana, Komufala Naftal Sakaria okwa hokolola ta ti omandini omahooli otaku fekelwa kutya okwa dja moAngola.
Omutamanekwa vati okwa dopa okuyandja ouyelele kutya omandini okwa dja peni konima eshi a pulwa kopolifi.
Opolifi oya kumaida oshiwana opo shi twikile nokulongela kumwe nopolifi mokukondjifa oimbuluma moshitukulwa. Oshiwana osha kumaidwa yoo vali opo shi kale tashi lopotele opolifi kombinga yovanhu va humbata omandini omahooli meetuwa davo.
fhamalwa@nepc.com.na