Victoria Immanuel

OSHAKATI – Omulumentu gwomimvo 28 ota mono uuhaku moshipangelo shaShakati sho anuwa a li ta kambadhala okwiikutha omwenyo.

Omugandji gwomauyelele gwopolisi moshitopolwa shaShana Frieda Hashiya okwa ti, oshiningwanima shoka osha holoka Etitano mOshakati poombelewa oonene dhOshakati Premier Electric.

“Omulumentu ngoka okwa pya olutu aluhe shi nyanyaleka, okwa pya nayi nolutu aluhe olwa pwa ko kiilalo,’’ Hashiyana ta popi ngaaka.

Ta ti, omulumentu ngoka anuwa okwa li i iyumbile kombanda yoongodhi dholusheno e ta fikwa kolusheno. Hashiyana okwa ti omukeeleli gomaliko oshowo aaniilonga mboka ya li po oya li ya kambadhala oku mu keelela ihe okwa tsikile okwiiyumbila kombanda yoongodhi dholusheno.

Oshiningwanima shimwe, olutu lwomulumentu gwomimvo 34 olwa adhika lwa endjelela mondunda ye yokulala. Oshiningwanima shoka anuwa osha holoka Olyomakaya momukunda Enoleu moshikandjohogololo Etayi.

Otaku hokololwa kutya nakusa okwa li a monika lwahugunina 07h30 esiku olyo tuu ndyoka ihe kakwa li anuwa ta ulike e na uudhigu wa sha.

Nakusa okwa tseyika nedhina Sakeus Kasheeta.

Sha ikwatelela kolopota yehangano lyuundjolewele muuyuni World Health Organisation (WHO), kehe momvula ohamu lopotwa iipotha yomayikuthomwenyo ya thika po800 000 muuyuni, naashika otashi ti kutya moosekonde 40 omu na omuntu ti ikutha omwenyo muuyuni awuhe, omanga aantu ye thike po 11 yomaantu ye li 100 000, oya kanitha oomwenyo kuyo yene. 

Oopelesenda 79% dhomwaamboka ya lopotwa yi ikutha oomwenyo oya za miilongo mbyoka yi na iiyemo yi li pevi oshowo yopokati. 

Oya lopota kutya eyikutho lyoomwenyo olya talika ko etiyali moNamibia, oshowo muuyuni awuhe.  

Iiyeetithi yomayikuthomwenyo shi ikolelela koolopota dhopolisi yaNamibia ongaashi: oluhepo, omakwatathano gopayihole, elongitho nayi lyomalovu niingangamithi, nokwaahe na uuyelele wa nkene omuntu e na okukonga omakwatho uuna e na uupyakadhi nomalimbililo.

Omaudhigu gomonkalamwenyo, okwaaholike, okwaa na nkene, omaudhigu momazimo, okwiisa uunye ngoye mwene.

WHO olya gandja natango uuyelele kutya omaikutho goomwenyo ohaga vulu okweetwa komaupyakadhi haga kala pokati kookuume ye li mohole.

Osho wo omatopoko gaaholike, oshimaliwa kaashi po, ekanitho lyiilonga, omaso gaapambele oshowo omahepeko.

-vkaapanda@nepc.com