RUACANA – Omukiintu gwomimvo 42, okwa hokolola nkene ye naanona ye li kohi yomimvo ya tidhwa megumbo komusamane gwe ngoka anuwa a ka kalela aakiintu yalwe koAngola.

Johanna Nangombe nomusamane anuwa oya hokanene pambelewa momumvo 2008, noye na aanona aanona yane pamwe, nayamwe yatatu mboka taya tekula.

Shika osha ningwa sho omusamane a pewa epitiko kompangu, nokulongitha opolisi okutidha omukulukadhi megumbo.

Nangombe, noyana ngashingeyi ohaya zi megumbo lyamushiinda moka ya pewa ondunda yomwiindhi ya siikilwa niinayilona kombinga, naashika oye wete shi li hwepo okuyelekanitha nopekota lyomuti mpoka ya li ya tidhilwa.

Nangombe okwa ti, omusamane gwe gwomimvo 56 ngoka edhina lye lyi shiwike kuKundana okwe ya tidha konima sho a lundile Nangombe kutya oha yi miihulo nomulumentu gulwe. 

Nangombe ota fekele kutya omusamane gwe okwe ya po nomahokololo giifundja oshoka okwa hala ya ze mo megumbo e li landithe po ngaashi a kala te shi popi, nonando egumbo ndyoka oye li kokola po ayehe. 

Ta ti, omusamane okwa ningi omimvo e ya thiga po e li koAngola hoka e na ko omagumbo naakulukadhi yaali oshowo aanona.

“Onda kala megumbo moka omimvo dha pita puhetatu a thiga ndje po a ya koAngola, ihe nena ondi li mepandaanda, omanga egumbo kali na omuntu, ye a shuna komagumbo ge koAngola,’’ ta popi nomahodhi taga tondoka.

Ta ti, okwa ningi omimvo ta longo epya lye, ihe nena otaya si ondjala omanga oshoka ke na uuthemba okuya mo megumbo a ka tale mo iilya mbyoka a longa.

Oondjuhwa niingulu ye oya sa kondjala, omanga iilya mbyoka ya li mepya ya lika po kiimuna. 

Omahepeko

Nangombe okwa popi kutya ohombo yawo nomulumentu ngoka kakwa li yopahole shili, oshoka omulumentu ngoka okwa li a kondjithwa a hokane po Nangombe kaakuluntu.

“Fabianus omumwamemegona, meme nahe aamwayinathana. Aakuluntu yandje okwa li ya gandja ndje miikaha ye, sho kwa li ta kongo omuniilonga koongeshefa dhe koAngola. Ihe konima yomasiku okwa ka tanaukila ndje po nokukwata ndje koonkondo e ta pendje etegelelo, nonando sha li sha thiki kopolisi, okwa li a tokola okukuthandje po,” ta hokolola ngaaka.

Nangombe okwa ti kutya sho ya ningi ohango yawo yopamuthigululwakalo, omusamane okwa li a gandja iigonda yongombe, iikombo iyali nomatemo gatano.

“Oshoka ethimbo ndyoka ohombo yopamuthigululwakalo kakwa li hayi gandjelwa onzapo, nena omusamane ota ipatana kutya inaya hokanathana nando.

“Omusamane gwandje okwe tu thiga po mo2016 a ya koAngola, ihe ina galuka ko we, ngele okwe ya po ita lala, ota shuna esiku ndyoka, ihe ohayi a tuta mo iinima megumbo,” ta popi ngaaka.

Ta hokolola kutya sho a mono omusamane ihee ya we kegumbo okwa tokola e ke mu konge, ihe sho a yi koAngola okwa adha omuniilonga ngoka kwa li ha longo megumbo, e li metegelelo lyomusamane gwe.

“Omuniilonga okwa li a hokolele ndje kutya omusamane gwandje sho a zi koNamibia okwa li e mu tanaukile po. Ye natango oku na omukulukadhi gumwe hoka ha yi,” ta ti ngaaka. Sho omusamane anuwa u uvu kutya Nangombe okwa li a yi koAngola te mu kongo, anuwa okwa li e mu landulile koNamibia noku mu ningila omatilitho kutya ngele okwe ende ko ishewe  koAngola ote mu dhipaga. 

Omulumentu nguka anuwa okwa li a faalele iimuna ayihe koAngola.

Ina kwathelwa

Omimvo a kala a taalela omahepeko, Nangombe anuwa okwa kala nokukonga omakwatho okuza kopolisi, kombelewa yuuministeli wokakwashikekookantu, kombelewa yakansela osho wo komalenga gopamuthigululwakalo ihe ina kwathelwa.

“Onda kala tandi lopota omahepeko nda taalela, mwa kwatelwa sho kwa li twa pewa uuzigo komusamane gwandje naanona megumbo, ihe onda kala nokulombwelwa kutya shoka oshipotha shopamuthigululwakalo ihe kashi shi shopolisi,” ta nyenyeta ngaaka.

Paife ota pula kutya, omusamane gwe okwa kwathelwa ngiini opo e ya tidhwe mo megumbo ngele ye okwa kala nokushunithwa ko kopolisi.

Nangombe okwa popi kutya, elelo lyopamuthigululwakalo lyUukolonkandhi olya tokola kutya omusamane ina enda mo we megumbo oshoka okwa tutu mo iinima ye ayihe nale, nongele a hala okutalela po oyana, na pite popolisi.

Ihe nena opolisi oyo tayi gandja oondjindikila opo kaye mo megumbo a ka tale mo iikulya mbyoka a longa.

Sho omusamane ngoka a li a dhengelwa koshifokundaneki shika atye ko sha kehokololo ndika, ongodhi ye okwa li ya dhima.

Momushangwa gwe ngoka gokwiindika aakwanezimo ya ye megumbo, okwa shanga mo kutya, ye ina hokana naNangombe pamuthigululwakalo nenge paveta.

“Ngame kandi na uudhigu naanona yandje ya kale mo megumbo, ihe onda lombwelwa kugumwe gomaanona yandje kutya yina oku na omusamane gulwe,” a shanga ngaaka.

“Meme ke na omusamane gumwe, po kape na nando ogumwe a popya iinima yi li ngaaka naye, ihatu mu mono,” gumwe gomaanona ta ti ngaaka, omanga yakwawo taya tilehi ehodhi. 

Oya gwedha ko kutya oya hala okushuna kegumbo.

Oshigwana sha lulilwa

Esther Senalye, omunashipundi momukunda Ombonde yomutwe wOndjamba okwa yambidhidha Nangombe noyana e te ya pe ondunda yomwiindhi megumbo lye.

“Kakwa li tandi vulu okutala aantu yomwenyo taya lala kohi yomuti,” ta nyenyeta ngaaka.   

Senalye, ngoka ta sile nale oshimpwiyu aanona 13 okwa ti, okwa gwedhelwa uudhigu waanona yahetatu oshoka oye na okutopola shoka shi li po, oshoka kaye na shoka taya li.

Ta ti, onkalo ya taalelwa kaanona mboka ondhigu, nokosikola itaya itula mo we.

“Oonzi dhaKalunga otadhi lala mevi moka oshoka ehala megumbo lyandje inali gwana,” ta popi ye ta zi omahodhi.

Omusita ngoka a kala te ya sile oshimpwiyu noku ya landela oomboloto konima ya tidhwa megumbo koRuacana Izata Nganga Calvalho, okwa ti, onkalo yaNangombe noyana kayi shi kwiidhidhimikilwa.

“Onda kala noku mu hunga omwenyo noku mu yakula mpoka tandi vulu. Onda kala tandi mu thindikile koompangu okuza esiku lyotango, ihe omasiku otaga undulilwa ashike komeho,” ta popi ngaaka. Ta ti oshipotha shoka osha undulilwa momasiku 17 gaApilili nuumvo. 

Kehe ngoka e na ehalo okuyambindhindha Nagombe noyana na dhenge koonomola 081 263 1973 or 0812003380.

-vkaapanda@nepc.com.na