Ompangulilo yamangestalata yoKeetmanshoop ongula yohela oya tindi eifutilo mo lyo omukiintu ngoka ta tamanekelwa endhipago lyomukiintu omukwao.
Isabella Eises ota tamanekelwa oshipotha shendhipago sho anuwa a tile omaholi nokutomoka omulilo Linda de Wee, oshinima shoka sha fala sigo omeso.
Oshipotha she okwali sha undulilwa momasiku 10 Novomba nuumvo, okugandja ompito kopolisi yi ninge omakonakono.
Sha ikolelela komushangwa gwopolisi oshingwanima shoka osha holoka Osoondaha momukunda Gainachas moshitopolwa shaKharas.
Otaku hokololwa kutya Eises okwali a tile De Wee omahooli nokumusameka omulilo sho ali ta fekele ena ekwatathano lyopahole nomusamane gwe.
Opolisi oya ti, omukiintu ngoka okwali a tilwa omahooli omanga inasamekwa omulilo, eta pi.
Otaku hokololwa kutya okwali a si kuululuume wiilali mbyoka yali yemufike oopelesenta 60.
vkaapanda@nepc.com.na