Omulumentu gwomimvo dhopokati okwa mangwa po kopolisi moshitopolwa shaShana sho anuwa a yaka po ohauto ndjoka a li a adha ya hungila okupendukila Osoondaha.

Oshinigwanima shoka osha ningilwa kOmpundja lwopo01h00 sho omuhingi gwohauto a li a ka tala sha megumbo.

Sha ikwatelela komuhingi gwohauto Aindji Haufiku okwa ti, okwa li ashike a yi megumbo a ka tala mo sha, ye a shune ngeno kOshakati.

“Sho nda galuka ohauto kayi po, omukeeleli gomaliko e li pomatungo goombelewa dhakansela okwe tu igidha kutya ohauto oya hingwa po komulumentu gumwe, ihe naye ke mu shi,” ta hokolola ngaaka.

Ta ti nonando kwa li ya kambadhala okulandula ko nohauto yimwe inaya mona mpoka a ningine.

Haufiku okwa ti, oya li ya lopota mbala kopolisi, ndjoka ya li ya yi molukongo meendelelo.

“Konima ashike yoowili dhomwiha Osoondaha, opolisi oya li ya lopotelwa ohauto ya falwa pongalashe yontumba kOngwediva. Sho ya yi ko oya adha ko ohauto njyoka tayi kongwa,” ta popi ngaaka.

Omupya gwe ogwa zi mpoka oshoka kamwa li mu na omahooli ga gwana okuhinga oshinano oshile. Ta ti, omulumentu gumwe gopongalashe mpoka anuwa okwa li a lopotele opolisi konima u uvu taku kongwa ohauto ya yakwa, shoka sha li she mu limbililike. Okwa li a gandja uuyelele awuhe kutya nakuyaka ohauto olye. Anuwa sho a fala ohauto okwa ti okwa sindana ohauto muudaisa.

Opolisi oya pandula oshigwana sho sha kala nokutaambathana uuyelele komalungula opo ku shiwike kutya ope na ohauto ya yakwa.

Tayi ti, olundji mboka haya yaka oohauto ohaye ke dhi landitha koAngola.

“Otatu kumagidha oshigwana shi tsikile okulongela kumwe nopolisi opo iimbuluma yi shune pevi moshilongo,” taya indile ngaaka.

Oya gwedha po kutya oshigwana ohashi dhana onkandangala onene noya simana okulwitha iimbuluma.

-vkaapanda@nepc.com.na