Regina Haikali ou e li oshihakanwa shomahepeko omomaumbo okwa tunga endiki lokukala ounona ovakwanaluhepo, eefiye noshoyo ounona vehe na apa tava di.
Endiki oli li momukunda Endola moshitukulwa shaHangwena nope na ounona 31 hava nangala momuhandjo novanailonga vavali tave liambe okufila ounona oshisho.
Okwa ti endiki okwe li tunga kongushu yoshimaliwa shi dulife N$100 000, noha li yandje oinyangadalwa yofikola kounona.
Haikali okwa ti elalakano lokutunga endiki okufila ounona oshisho vehe na apa tava di ile tava ningilwa omahepeko omomaumbo.
Onghee okwa ti okwa kwatwa komhepo yolukeno opo a kale ta yambidida ounona molwashi okwa pita moupyakadi wokuningilwa omahepepo omomaumbo lwoikando ya yooloka.
Okwa hokolola ta ti okwa ningilwa omahepeko komushamane waye wotete momudo 2013 omo kwa li ha dengwa nokutukwa.
“Momudo 2016 onda hombolwa vali komushane umwepo ashike okwa kala a denge nge pefimbo kwa li dina eteelelo. Okwa li nda pita mekende londuda pefimbo kwa li handi dengwa,” ta hokolola.
Onghee okwa ti okwa pita momashongo a yooloka naashi oshe mu pa olukeno opo a yambidide ounona va taalela omashongo a yooloka.
Okwa yelifa ta ti endiki olo okwe li tunga noshimaliwa shaye mwene, novadali vounona ve li pendiki iha va futusha oshimaliwa shonhumba.
“Endiki ola nuninwa ounona va dja koitukulwa ya yooloka. Onghee omudali keshe e na oupyakadi wokutekula okaana kaye okwa manguluka okukala a twala okaana kaye kendiki,” ta ti.
Okwa ti endiki e li ota li kwafele yoo vali okulela ounona vaha ninge oihakanwa yoku kupulwashi.
Haikali okwa ti ku kushe ou e na ehalo lokuyambidida ounona ve li pendiki noikulya ile noikwafifo ya yooloka okwa manguluka okukwatafana naye konomola yongodi yaye 0818718004.
Helena Kamati e na okaana ke li pendiki opo, okwa hokolola ta ti endiki ole mu kufa omukundu molwashi okwa li a talela eshongo linene lokuyambidida ounona vaye.
Okwa ti alushe okwa li a kala a twetwenya koluhepo ehe na oikulya yoku pa ounona vaye.
“Onda pandula unene endiki e li molwashi ole tu yambidida unene tuu ovadali fye tu li moluhepo,” ta ti.