Ongwediva –Opolifi moshitukulwa Oshana otai kongo omulumenhu, omukwashiwana waZimbabwe omunamido 41, molwa edipao laChipuriro Botham (51) naye a yambukile koZimbabwe.
Otaku fekelwa Lengton Mbeki, a shiivika nawa nedina Peter, oo paife ta kongwa kopolifi, a dipaa Botham nodopi, sha landula eenhamanana da etwa koN$20 yotaxi.
Oshiningwanima eshi osha ningilwa molukanda Uupindi mOshakati, konguloshi lela yOsoondaha, lwopotundi 23h40.
Ookaume ava vati ova dja kOndangwa notaxi va yuka kOshakati, ashike Botham ka li e na oshimaliwa shotaxi. Mbeki okwa futila kaume kaye, ashike eshi va ka ya kolukanda Uupindi mOshakati, Botham ina dula okufuta oshimaliwa shovanhu. Eshi osha eta eenhamanana, naMbeki okwa kufa odopi, noku i dengifa Botham moshipala, nokufaduka po. Botham opo a fila opo. Omufekelwa ou fiyo onena ina kwatwa po, nopolifi oi mu li mokashoko.
Oshingwanimwa eshi osha ningwa ashike konima yoshivike, eshi Ovazimbabwe vatatu va kwatwa po omolwa edipao nexwikopo lolutu lokaana komido omulongo. Umwe womovafekelwa oina yokaana oko, omupangi keifano. Omufekelwa wotetete moshinima eshi, omulumenhu, oo vati kwa li ha longo onga omufita-ongalo pefimbo lomutenya, ashike oufiku oha longo onga ondudu.
Ovakainhu vavali ova holoka nale momhangulilo yaMangestalata moWindhoek, omanga omulumenhu oo a tongololwa nedina Edward Nkata, e li moshipangelo, a mona oshiponga konima eshi embaba lopolifi olo a li la kandoma manga va li tava di konhele oko a kwatelwa. Onghalo yaye vati otai etifa eenghono.
Kakele komadipao, opolifi yaShana oya lopotelwa vali oiningwanima ivali yomalidipao omo ovanhu vavali ve lidipaa.
Oshiningwanima shaxuuuninwa osha ningwa mOsoondaxa lwopotundi 15h00, eshi omukainhu womido 22, e limangeleka noshilapi meumbo lavo momukunda Oshuuushe popepi nOndangwa.
Okakadona aka kedina Aili Tschikwambi, otaku hokololwa ke limangelekela monduda i li meumbo lavo.
Oka fiya po okambapila omo ka shanga oitya inini lela. “Kala po nawa meme, onda hala ashike okufuda po,” osho okambaapila ka nyolwa. Henok Amadhila naye okwe likufa omwenyo, eshi e limangelekela monduda yaye yokunangala nodalate, momukunda Oponona B, moshitukulwa Oshana. Okwa li e na omido 44. Amadhila ina fiya po uyelele washa kutya okwe limangelekela shike. Ovakwapata laye ova shivifilwa. Omupopiliko wopolifi mOshitukulwa shaShana Frieda Shikole okwa koleka oiningwanima aishe itatu.