Auleria Wakudumo
Oshibofa sheumbondjebo osha patululilwa omulumenhu weedula 39 kopolifi moshitukulwa shaShana eshi vati a ponokela kahewa kaye kwa li wopaihole nombistoli oufiku wOsoondaxa.
Omukulunhu wopolifi moshitukulwa shaShana, Commissioner Naftal Lungameni Sakaria okwa holola kutya oshiningwanima osha ningilwa kOluno mOndangwa.
Sakaria okwa ti omufekelwa okwa taalela yoo oshibofa eshi a umba ondjebo ponhele yamuni osho yo oshibofa shokuninga omatilifo, e a ningila omukainhu waye kwa li. Vati omufekelwa okwa ya konduda yakaume kaye kwa li wopaihole.
“Okwa konghola pomuvelo, ta pulwa a yeululwe ashike omukainhu okwa anya shaashi okwa li e li nakaume kaye wopaihole mupe,” Sakaria ta ti.
Omufekelwa vati okwa kufa mo ombistoli, ta tameke okuyasha otuwa yomumati wakahewa kaye wopaihole mupe. Otuwa vati oya li i li komesho yonduda.
Sakaria okwa ti eembululu deeholo hamano oda monika kotuwa, omakende otuwa vati nao okwa tatuka mo osho yo oikuti 12 oya hangika poshiningwanima.
Nande ongaho, opolifi oya ti kape na ou a ehamekwa moshiningwanima omo.
Omukulunhu wopolifi moshitukulwa shaShana, Commissioner Naftal Lungameni Sakaria.
Efano: Otwe li pewa