Auleria Wakudumo
Omusamane weedula 52 okwa xulifa omanga omonamati weedula 22 a xupa moshiponga shodila eshi vati kwa li tava taataa ookavandje nomatotongwe nodila hai ifanwa oWindlass Aquila Microlight mofaalama yavo.
Oshiningwanima eshi osha ningilwa kofaalama Grass, momudingonoko waKalkrand, sha ningwa Olomakaya lwopo 08h45.
Nakufya okwa tongololwa oye Johannes Jakobus Spangenberg. Omupopiliko wopolifi, Deputy Commissioner Kauna Shikwambi okwa koleka oshiningwanima eshi.
Otaku hokololwa Spangenberg a li ta kongo ookavandje nomatotongwe oo vati a ninga efimbo taa dipaa oimuna yavo mofaalama.
“Omanga odila i li mombada, ova mona kavandje eli pedu ndele tava kendabala oku mu yasha ashike oholo inai kwata,” Shikwambi ta ti.
Konima vati ova tokola okuukifa odila pedu opo va dule okuyasha kavandje ashike omushingi wodila okwa ya unene pedu ndele ta nyengwa okuukililifa odila opo i shune vali pombada nokulidenga momamanya.
Spangenberg oo a li nakushinga odila okwa xulifila poshiningwanima omanga omona a ehama ashike kashona mepepe nota mono epango lopaunamiti.